राजविराज । नेपाली कांग्रेस, सप्तरीले राजविराज नगरपालिकामा मधेश कृषि विश्वविद्यालयको शिलान्यास विवादकाबीच हुनुलाई दुर्भाग्यपूर्ण भनेको छ ।
पार्टीका जिल्ला सचिव सनत मण्डलले मंगलबार बिज्ञप्ती जारी गर्दै शिलान्यास कार्यक्रममा भएका घट्नाप्रति गम्भीर ध्यानाकर्षण भएको बताएका छन् ।
‘विकास निर्माणका कामहरुमा सबै राजनीतिक दलको सहभागिता हुनुपर्नेमा विवादकाबीच हुनु दुर्भाग्यपूर्ण हो’ बिज्ञप्तीमा भनिएको छ, ‘विकासका लागि सहकार्य, समन्वय गरी एकताबद्ध भएर अघि बढ्न र सबैलाई संवेदनशिल बन्न सप्तरी कांग्रेस हार्दिक अपील गर्दछ ।’
बिज्ञप्तीमा घाइतेहरुको शिघ्र स्वास्थ्य लाभको कामना समेत गरिएको छ ।
सोमबार राजविराज नगरपालिका वडा नम्बर १३ बिषहरियामा मधेश कृषि विश्वविद्यालय शिलान्यास भइरहँदा जसपा अध्यक्ष उपेन्द्र यादवलाई चिढाएर स्वागत गर्न गएका जनमत पार्टीका नेता÷कार्यकर्तामाथि प्रहरीले लाठी प्रहार गरेको थियो । लाठी प्रहारबाट पार्टीका नेता एवं प्रदेशका शिक्षा तथा संस्कृति मन्त्री महेश यादव, प्रदेश सभा सदस्य सतिश सिंहसहितका घाइते भएका थिए ।
