राजविराज । नेपाली कांग्रेसका महामन्त्री गगन थापाले अब बन्ने नयाँ मन्त्रीमण्डलमा मधेशको प्रतिनिधित्व हुने बताएका छन् ।
नयाँ मन्त्रीमण्डल बन्दै गर्दा तपाईंले खोजेको अनुहारको प्रतिनिधित्व हुन्छ’ समुदायमा नेपाली कांग्रेस अभियान अन्तर्गत सप्तरी क्षेत्र नम्बर ४ समितिले आयोजना गरेको भेटघाट कार्यक्रमलाई सम्बोधन गर्दै थापाले भने, ‘त्यसको आधार हामीले बनाइसकेका छौं ।’
राजनीतिक नियुक्ति गर्दा सिंगो देशलाई समेट्नुपर्ने उल्लेख गर्दै उनले बजेट विनियोजन गर्दा पनि जनसंख्याको आधारमा गर्नुपर्नेमा जोड् दिए । ‘प्रधानमन्त्री या अर्थमन्त्री कुनै नीजि कम्पनी होइन्’ थापाले भने, ‘जनसंख्याको आधारमा बजेट विनियोजन गर्नुपर्छ ।’
यसअघि नेपाल प्रेस युनियन, सप्तरीले राजविराजमा आयोजना गरेको पत्रकार सम्मेलनमा बोल्दै थापाले शिक्षा, स्वास्थ्यको अवस्था र युवा तथा किसानहरुको मनोविज्ञान बुझ्न माघ १३ गतेबाट देशैभरि अभियान प्रारम्भ गरिएको बताए ।
अभियान अन्तर्गत काँग्रेसका नेताहरु देशैभरिको ६ हजार ७ सय ४३ वटै वडामा पुगेर समुदाय संग अन्तरक्रिया गरी त्यसबाट आएका विचार महासमितिको बैठकमा लिएर जाने जानकारी दिए । ‘हामी यस अभियानबाट दुई किसिमको विचार लिएर जान्छु, एउटा पार्टीको आन्तरिक जिवन संग सम्बन्धित विचार महासमितिको बैठकमा र अर्को अहिलेको अवस्थामा पार्टीले देशको बारेमा लिनुपर्ने नीतिको सम्बन्धमा’ महामन्त्री थापाले भने ।
