राजविराज । एकै परिवारका दुई दाजुभाई न त बोल्न सक्छन्, न त सुन्छन् नै । ३ बर्षीय दाजु र १ बर्षीय भाईो यस्तो अवस्था भएपछि परिवारजन चिन्तित भएका छन् ।
सप्तरीको सप्तकोशी नगरपालिका वडा नम्बर २ निवासी तेजनारायण ठाकुरको परिवारमा यस्तो समस्या देखिएको छ । उनका दुबै छोरामा यस्तो समस्या छ । ठूलो छोरा कृष्ण र कान्छो छोरा रामले न त केहि सुन्छन् न त केहि बोल्छन नै ।
काडमाडौंमा बसेर अर्काको सैलुनमा काम गर्दै आएका ठाकुरलाई दुबै छोराको एकै किसिमको समस्या देखापरेको हो । ‘जन्मिँदा दुबै स्वस्थ्य थिए’ उनले भने, ‘तर पछि कोहि पनि बोल्दैनन् । र, कोहि पनि सुन्दैनन् ।’
उनले दुबै छोरालाई अस्पताल लगी चिकित्सकसँग चेकअप गराएका छन् । चेकअपको क्रममा चिकित्सकले दुबैको कानमा डिभाइस लगाउन भन्नुभएको छ’ उनले भने, ‘यो डिभाइस लगाएपछि सुन्ने र विस्तारै बोल्न पनि लाग्ने जानकारी दिइएको छ ।’
एउटा डिभाइसको रु १२ लाख पर्ने जानकारी दिइएको भन्दै उनले आफ्नो क्षमताले किन्न नसकिने बताए । दुबै छोरालाई डिभाइस लगाउँदा रु २४ लाख खर्च हुने उनले बताए ।
आर्थिक अवस्था अत्यन्तै कमजोर रहेको बताउँदै ठाकुरले यो डिभाइस लगाउने क्षमता आफ्नो नभएको बताए ।
उनले नगरपालिकामा गुहार लगाउँदा वडा कार्यालयले आर्थिक सहयोग गरिदिन एउटा सिफारिस पत्र बनाइदिएको बताए । ‘जनप्रतिनिधीले कार्यपालिकाको बैठक बसेर सहयोग गर्नेबारे जानकारी दिनुभएको छ’ ठाकुरले भने ।
उनले आफू एक्लैले यत्रो रकम जुटाउन नसक्ने भन्दै सहयोग गरिदिन सबैसँग आग्रह गरेका छन् । ‘म सबैसँग दुई हात जोडेर आग्रह गर्छु, मेरो छोरा सुन्न र बोल्न सकोस्, त्यसका लागि सहयोग गरिदिनुस् ।’
