राजविराज । नेपाली कांग्रेसका युवा नेता इर्साद अन्सारीले शहीद दिवसका दिन नेपाल सरकारले विदा कटौति गरेकोप्रति आपत्ति जनाएका छन् ।
शहीदहरुको सम्झनामा नेपाली कांग्रेस निकट नेपाल विद्यार्थी संघ (नेवि संघ) ले मंगलबार आयोजना गरेको मैनबत्ति प्रज्जवलन कार्यक्रमलाई सम्बोधन गर्दै नेता अन्सारीले उक्त आपत्ति जनाएका हुन् ।
जहाँनियाँ राण शाषणविरुद्ध लडेका चार जना शहीदको सम्झना गर्ने दिन सरकारले विदा दिदैं आएकोमा यस पटक कटौति गर्नु खेदजनक भएको उनले बताए ।
ती चार जना शहीद लोकतान्त्रिक आन्दोलनका पहिलो शहीद भएको चर्चा गर्दै उनले भने, ‘अहिले हामी स्वतन्त्र भएर बोलिरहेका छौं’ यो श्रेय पहिला उहाँहरुलाई जान्छ ।’
शहीदहरु दशरथ चन्द, धर्मभक्त माथेमा, गंगालाल श्रेष्ठ र शुक्रराज शास्त्रीको स्मरणमा सरकारले यसअघि शहीद दिवस मनाउँदै सार्वजनिक विदा दिदैं आएको थियो । यस पटक विदा दिइएन् ।
राजविराजस्थित जनआन्दोलन चोकमा आयोजित मैनबत्ति प्रज्जवलन कार्यक्रममा कांग्रेस सप्तरीका उपसभापति रामकुमार यादव, नेवि संघका सभापति राकेश ठाकुरसहितको उपस्थिति थियो ।
