राजविराज । नेपाली कांग्रेस, सप्तरीका कार्यकर्ताहरुले पार्टीको शाख गुमिसकेको बताएका छन् । उनीहरुले गुमेको शाख फिर्ता ल्याउन दूरदर्शी, ऐतिहासिक र परिणाममुखी कदम चाल्न ढिलो भइसकेको भन्दै महामन्त्री गगन थापाको ध्यानाकर्षण गराएका छन् ।
समुदायमा नेपाली कांग्रेस अभियान अन्तर्गत सप्तरी आएका महामन्त्री थापालाई क्षेत्र न्म्बर ४ का नेता/कार्यकर्ताले ज्ञापन बुझाउँदै उक्त ध्यानाकर्षण गराएका हुन् । नेपाली कांग्रेसका नेता÷कार्यकर्ताले भ्रष्टाचारका बिषयमा गम्भीर भई यसलाई जराबाटै समाप्त गरी सुशासन कायम गर्न नसकेको हुँदा यो पार्टी आम जनता समक्ष घृणाको शिकार भइरहेको ज्ञापनमा उल्लेख गरिएको छ ।
ज्ञापनमा सरकारको मन्त्रीपरिषद्, संवैधानिक, राजदूत नियुक्ति लगायत संसदीय तथा राष्ट्रिय सभाको चुनावमा मधेशी, आदिवासी, जनजाती, थारु, दलित, मुश्लिम र पिछडिएको वर्गलाई कांग्रेसले किन भेदभाव गरेको भनी प्रश्न गरिएको छ ।
ज्ञापनमा कांग्रेसले लोकतान्त्रिक गणतन्त्र व्यवस्था अनुरुप बाहुनवाद तथा एउटै जातको एकाधिकारको अन्त्य गर्नुपर्ने, तराई मधेशलाई भोट बैंकको रुपमा लिएकाले त्यस अनुरुप पार्टीमा नेता÷कार्यकर्तालाई उचित जिम्मेबारी दिनुपर्ने माग गरिएको छ ।
यस्तै, रामराजा स्वास्थ्य विज्ञान प्रतिष्ठानमा एमबिबिएस, बिडिएस लगायत अन्य कार्यक्रमको अध्ययन अध्यापन गराउन नेपाल सरकारलाई कानुनी व्यवस्था मिलाउन तत्काल ऐन जारी गर्नुपर्ने, गजेन्द्रनारायण सिंह अस्पताललाई राष्ट्रियस्तरको अस्पतालमा परिणत गरी गुणस्तरीय सेवा र सुविधा दिनुपर्ने, सप्तरीको उत्तरी क्षेत्रबाट सप्तकोशी–कमला डाइभसैन निर्माण गर्नुपर्नेसहितका माग ज्ञापनमा गरिएको छ ।
क्षेत्र न्म्बर ४ का नेता/कार्यकर्ताको तर्फबाट प्रतिनिधी सभा सदस्य तेजुलाल चौधरीले महामन्त्री थापालाई बोदे बर्साइन नगरपालिकामा ज्ञापन बुझाएका थिए ।
ज्ञापन बुझ्दै महामन्त्री थापाले मागहरुलाई सकारात्मक रुपमा लिएको र पूरा गराउन आफूले पहल गर्ने प्रतिबद्धता जनाएका थिए ।
