राजविराज । मधेश प्रदेश सरकारले ध्वनी प्रदूषण रोक्न सबै पालिकालाई पत्राचार गरेको छ ।
बिभिन्न स्थान र कार्यक्रममा ठूला आवाजमा बजाइने डिजे साउण्ड सिस्टमले ध्वनी प्रदुषण भई स्वास्थ्यमा प्रतिकुल असर पारिरहेको भन्दै यसलाई रोक्न प्रदेशभरिका सबै पालिकालाई पत्राचार गरिएको छ ।
प्रदेशको गृह, संचार तथा कानुन मन्त्री राजकुमार लेखीको अध्यक्षतमा मंगलबार बसेको सुरक्षा समितिको बैठकले ध्वनी प्रदुषण सम्बन्धमा जनगुनासोहरु आइरहेको हुँदा सो कार्यलाई रोक्न जिल्ला प्रशासन कार्यालय र स्थानीय तहलाई अनुरोध गर्ने निर्णय गरेको थियो ।
सोही निर्णयलाई कार्यान्वयन गराउन बुधबार सबै पालिका र जिल्ला प्रशासन कार्यालयलाई पत्राचार गरिएको छ ।
राजविराजमा पछिल्लो पटक अत्यधिक ध्वनी प्रदुषण गराइएको छ । आफ्नो घरमा हुने पूजापाठ समेत ठूलो आवाजमा सुनाइने गरिएको छ । बिहान साढे ४ बजे यहाँका मस्जिदमा ठूलो स्वरमा साउण्ड सिस्टम बजाउने गरिन्छ भने दिनभर पुरान, यज्ञस्थलमा चर्काे आवाजमा साउण्ड बजाउँदा जनजीवन कष्टकर बनेको छ ।
चर्काे साउण्डका कारण मुटु रोग, कान सम्बन्धीसहित बिभिन्न रोग लाग्ने गरेको बुझ्दाबुझ्दै पनि यहाँ ध्वनी प्रदुषण गराउनेको संख्या बढ्दै गएको छ ।
