राजविराज । राष्ट्रपति रामचन्द्र पाैडेलकाे सबारी हुने छिन्नमस्ता मन्दिर प्राङ्गणलाई दुलही झैं सिङारिएको छ ।
मन्दिर प्राङ्गणमा व्यापक सरसफाइ गर्दै रङरोगन गरिएको छ ।
राष्ट्रपति पौडेल पुजापाठका निम्ति मंगलबार (भाेली) मुलुककै प्रसिद्ध सप्तरीको छिन्नमस्ता मन्दिर आउँदैछन् । उनी बिहान ८ बजे मन्दिरमा आउने कार्यतालिका छ ।
राष्ट्रपति सबारीको आवश्यक सबै तयारी भइसकेको छिन्नमस्ता गाउँपालिकाका अध्यक्ष विद्यानन्द चौधरीले जानकारी दिए ।
उनका अनुसार राष्ट्रपतिलाई पालिकाका जनप्रतिनिधिले मौलिक तरिकाले स्वागत गर्नेछन् । पुरुष जनप्रतिनिधि धोती र कुर्ता तथा महिला जनप्रतिनिधि साडी लगाएर स्वागतमा सहभागी हुने अध्यक्ष चौधरीले बताए ।
राष्ट्रपतिकाे सबारी हुने भएकाले मूल गेटबाट मात्रै आवतजावतको व्यवस्था मिलाइएको सप्तरी प्रहरी प्रमुख एसपी गजुसिद्दी बज्राचार्यले जानकारी दिए । उनका अनुसार सुरक्षा जाँच गरेर प्रवेश गर्न दिइनेछ ।
