गंगा प्रसाद साह
भारदह । जनप्रतिनिधिको क्रिकेट टिम कर्मचारीको क्रिकेट टिमसँग पराजित भएको छ ।
सप्तरीको हनुमाननगर कंकालिनी नगरपालिका वडा नम्बर १ भारदहमा शनिबार भएकाे क्रिकेट खेलमा कर्मचारीको टोलीले जनप्रतिनिधिको टोलीलाई १९ रनले पराजित गरेको छ ।
टस जितेर पहिले ब्याटिङ गरेको कर्मचारीको टोली निर्धारित ८ ओभरको खेलमा ३ विकेट गुमाएर ५६ रन बनाएको थियो । टिमका लागि अमित मन्डलले १७, बिनोद रजकले १२ रन बनाए ।
बलिङ्तर्फ शंकर खडगाले २ र राजेश मण्डलले १ विकेट लिए ।
प्रतिउत्तरमा ब्याटिङ थालेको जनप्रतिनिधिको टोली निर्धारित ओभरमा ७ विकेट गुमाएर ३७ रन मात्र बनाउन सक्यो । यो टिमका लागि शंकर खडगाले सर्वाधिक १० रन जोडे ।
कर्मचारीको तर्फबाट धर्मेन्द्र खडगाले २ तथा श्यामसुन्दर मण्डल, पप्पु माझी, अहिरन यादव, अमित मण्डल र बिनोद रजकले १/१ विकेट लिए ।
शनिबारदेखि शुरु भएको दोस्रो भारदह कप टी-ट्वान्टी क्रिकेट प्रतियोगिताको उद्घाटनको अवसरमा जनप्रतिनिधि र कर्मचारीबीच खेल गराइएको छ ।
नगरपालिकाको वडा नम्बर १ भारदहका वडा अध्यक्ष सुरेन्द्र मण्डलको अध्यक्षता र प्रदेश सभा सदस्य सकिल अलीको प्रमुख आतिथ्यमा आयोजित क्रिकेट उद्घाटनमा नगरपालिकाका मेयर बिरेन्द्र माझी, उपमेयर सरिता सिपलिया, थानेश्वर साह, देबनाथ यादवसहितकाले मन्तव्य व्यक्त गरेका थिए ।
प्रतियोगिताको मधवापुर र पोर्ताहाबीच भएको उद्घाटन खेलमा विवाद भएपछि खेल रद्द गरिएको आयोजकले जनाएको छ ।
