राजविराज । भ्रष्टाचार अभियोगमा मुद्दा खेपिरहेका सप्तरीको बिष्णुपुर गाउँपालिकाका अध्यक्ष उमेश यादवले सफाई पाएका छन् ।
अख्तियार दुरुपयोग अनुसन्धान आयोगले यादवविरुद्ध विशेष अदालतमा भ्रष्टाचार सम्बन्धी मुद्दा दायर गरेको थियो । विशेष अदालतको शुक्रबार सुनुवाई हुँदा उनले सफाई पाएका छन् ।
विशेष अदालतका अध्यक्ष टेकनारायण कुँवर तथा सदस्यद्धय मुरारीबाबु श्रेष्ठ र तेजनारायण सिंह राईको संयुक्त इजलासले गाउँपालिका अध्यक्ष उमेशसहित कम्प्युटर अपरेटर बिरेन्द्र यादव र लेखापाल टेकनारायण यादवलाई सफाई दिएको छ ।
लेखापाल टेकनारायण र कम्प्युटर अपरेटर बिरेन्द्र गत ३१ साउनमा राजविराजस्थित गजेन्द्र चोकबत्राट कमिसनको रु २ लाख नगद र ३ लाखको चेक लिदैं गर्दा अख्तियारले पक्राउ गरेको थियो । अख्तियारले तीनै जनाबिरुद्ध २९ भदौमा मुद्दा दायर गरेको थियो ।
मुद्दा दायरपछि बयान दिन गएका अध्यक्ष उमेशलाई अख्तियारले नियन्त्रणमा लिएको थियो । उनी धरौटिमा रिहा भएका थिए ।
यसअघि सप्तरीको बोदे बर्साइन नगरपालिकाका मेयर आतेश सिंह यादवले समेत भ्रष्टाचार सम्बन्धी मुद्दामा विशेष अदालतबाट सफाई पाइसकेका छन् ।
