राजविराज । रामराजा प्रसाद सिंह स्वास्थ्य विज्ञान प्रतिष्ठानको शिलान्यास भएको दिनको स्मरण गरिएको छ । यो अवसरमा विविध कार्यक्रमको आयोजना गरिएको छ ।
स्वास्थ्य विज्ञान प्रतिष्ठान पूर्वाधार तयारी विकास समितिद्धारा दौड कार्यक्रम, गजेन्द्रनारायण सिंह अस्पतालका बिरामीलाई फलफुल बितरण, अस्पतालमा सरसफाई तथा अन्तरकृया कार्यक्रमको आयोजना गरिएको छ ।
स्वास्थ्यका लागि दौड भन्ने नारासहित शनिबार बिहान राजविराजको राजदेवी चोकदेखि गजेन्द्रनारायण सिंह अस्पतालसम्म दौड कार्यक्रमको आयोजना गरिएको छ । दौडमा ५० भन्दा बढी व्यक्तिको सहभागिता रहेको विकास समितिका अध्यक्ष प्रा. डा. पशुपति चौधरीले जानकारी दिए ।
उनका अनुसार बिहानै अस्पतालको सरसफाई गर्दै बिरामीलाई फलफुल बितरण गरियो ।
यस्तै, अस्पतालको सभाहलमा आयोजित अन्तरकृया कार्यक्रममा डा. चौधरीले प्रतिष्ठानबारे प्रस्तुतिकरण गरे ।
त्यस अवसरमा बोल्दै उनले प्रतिष्ठान निर्माण गराउन राजनीतिक दललाई अगाडि आउनुपर्ने बताए । राजनीतिक दलका जिल्लास्थित नेताहरु एकजुट भएर अघि बढे र सबैले सहयोग गरे प्रतिष्ठान निर्माणको काम चाँडै हुने उनले विश्वास व्यक्त गरे ।
डा. चौधरीले कार्यक्रममा सबै राजनीतिक दल, पालिका प्रमुखसहित सबै सरोकारबालालाई निमन्त्रणा गरी बोलाएपनि नआइदिएको गुनासो गरे । कार्यक्रममा नेकपा माओवादी केन्द्र जसपा नेपाल र जनमत पार्टीका नेता एवं राजविराज नगरपालिकाकी उप प्रमुख इसरत परबिनको मात्रै उपस्थिति थियो । अन्य क्षेत्रका व्यक्तिको पनि न्यून उपस्थिति थियो ।
तीन बर्षअघि २२ असारकै दिन तत्कालिन प्रधानमन्त्री केपी शर्मा ओलीले भर्चुअल माध्यमबाट स्वास्थ्य विज्ञान प्रतिष्ठानको शिलान्यास गरेका थिए ।
राजविराज नगरपालिका वडा नम्बर १० स्थित बिरौलमा शिलान्यास गरिएपनि निर्माण काम अझ अगाडि बढ्न सकेको छैन् । घेरबार मात्रै गरिएको छ ।
