राजविराज । निरंकुश बनेको भन्दै सप्तरीको डाक्नेश्वरी नगरपालिकाका मेयर रामलखन मलाहको पुत्ला जलाइएको छ ।
नगरपालिकाभित्रका चार दलका नेता÷कार्यकर्ताले शनिबार साँझ मेयर मलाहको पुत्ला जलाएका छन् । नेपाली कांग्रेस, नेकपा माओवादी केन्द्र, जसपा र लोसपाका नेता कार्यकर्ताहरुले पातो बजारमा मलाहको पुत्ला जलाए ।
यी दलका नेताहरुले बिभिन्न माग राख्दै गत जेठ १ गते नै ज्ञापन बुझाएको भएपनि हालसम्म माग पूरा नगरेको बताए । मलाहले पटक–पटक वार्तामा बोलाएपनि माग पूरा नगरेकाले पुत्ला जलाइएको जसपाका नेता ओमप्रकाश यादवले बताए ।
चार दलका नेताहरुले राजनीतिक प्रतिशोध साध्न गरिएको शिक्षक सरुवा अविलम्ब खारेज गर्नुपर्ने, दरबन्दी मिलान बेगर शिक्षकको सरुवा गर्ने निर्णयमा सहभागी शिक्षा अधिकृत कृष्ण कुमार यादवलाई सरुवा गर्न, नगर शिक्षा ऐन संशोधन गर्न, राजनीतिक पुर्वाग्रही तरिकाले हटाइएका कर्मचारीलाई पुनर्वहाली गर्न, सामाजिक सुरक्षा भत्ता त्रैमासिक रुपमा उपलब्ध गराउन, कोरोनाको समयमा गरिएको खर्चको आयव्यय सार्वजनिक गर्न, सर्पदंस अस्पतालको लागि खरिद गरिएको उपकरणमा भएको अनियमितता छानबिन गरी अविलम्ब संचालन गर्न, सर्वदलीय बैठकद्वारा टोल बस्ती समिति अविलम्ब गठन गरि संचालन गर्नसहितका माग राखेका छन् ।
