राजविराज । सप्तरी सदरमुकाम राजविराजमा बन्न लागेको रामराजाप्रसाद सिंह स्वास्थ्य विज्ञान प्रतिष्ठानले बिभिन्न बिषयमा सम्नवय र सहकार्य गर्नका लागि धरानस्थित विपी कोइराला स्वास्थ्य विज्ञान प्रतिष्ठानसँग सम्झौता गरेको छ ।
रामराजा स्वास्थ्य विज्ञान प्रतिष्ठान पूर्वाधार विकास समितिका अध्यक्ष प्रा.डा. पशुपति चौधरीले दुबै प्रतिष्ठानबीच समन्वय र सहकार्यका निम्ति सम्झौता भएको जानकारी दिए । उनका अनुसार संकाय परिवर्तन, स्वास्थ्य शिक्षा, अनुसन्धान सहकार्य र एकअर्का संस्थाका सुविधाहरु आदान—प्रदान गर्नेलगायतका सम्झौता भएको छ । सम्झौतापछि विपी स्वास्थ्य विज्ञान प्रतिष्ठानले शैक्षिक विकास र स्वास्थ्य सेवा प्रवाहका लागि सहयोग गर्ने प्रा.डा. चौधरीले जानकारी दिए ।
बन्न लागेको रामराजा र देशकै ठूलो विपीबीचको सहकार्यले स्वास्थ्य क्षेत्रमा विकासका लागि सम्झौता महत्वपूर्ण भएको डा. चौधरीले बताए ।
सम्झौतामा रामराजाको तर्फबाट प्रा.डा. चौधरी र विपीको तर्फबाट उपकुलपति डा. ज्ञानेन्द्र गिरीले हस्ताक्षर गरेका छन् ।
