राजविराज । गुडिरहेकै अवस्थामा बसबाट हाम फालेका सप्तरीका एक युवकको सर्लाहीमा ज्यान गएको छ ।
मृत्यु हुनेमा सप्तरीको शम्भुनाथ नगरपालिका वडा नम्बर ४ निवासी शंकर चौधरी रहेको सर्लाही प्रहरीले जानकारी दिएको छ । बसको ढोकाबाट हाम फालेर गम्भीर घाइते भएका ३० बर्षीय चौधरीको उपचारको क्रममा मृत्यु भएको हो ।
प्रहरीका अनुसार पूर्व पश्चिम राजमार्ग अन्तर्गत बाँके जंगलमा काठमाडौँबाट विराटनगरतर्फ जाँदै गरेको ना. ७ ख १०५० नम्बरको बसबाट चौधरीले हाम फालेका हुन् । सोमबारको यो घट्ना भएको प्रहरीको भनाई छ ।
बसको ढोकाबाट हाम फालेर गम्भीर घाइते भएका चौधरीलाई सर्लाहीकै लालबन्दीमा सामान्य उपचार गराई थप उपचारका लागि वीरगंज लैजाँदा चिकित्सकले मृत घोषणा गरेका थिए ।
बाराको पथलैयाबाट बस चढेका चौधरी एक्कासी आफैँले बसको ढोकाबाट हाम फालेको प्रत्यक्षदर्शीहरुले बताएका छन् । घटना सम्बन्धमा अन्य अनुसन्धान गरिरहेको जिल्ला प्रहरी कार्यालय, सर्लाहीले जनाएको छ ।
