राजविराज । सहमति अनुसार राजविराज–छिन्नमस्ता सडक निर्माण नगरेको भन्दै छिन्नमस्ता गाउँपालिकाका जनप्रतिनिधीहरुले सिरहाको लहानस्थित सडक डिभिजन कार्यालयमा धर्ना दिएका छन् ।
आईतबार लहानस्थित सडक डिभिजनको कार्यालय पुगेका छिन्नमस्ताका जनप्रतिनिधीले ३ घण्टा धर्ना दिदैं नाराबाजी गरेका छन् । गाउँपालिका अध्यक्ष विद्यानन्द चौधरीको नेतृत्वमा गएका जनप्रतिनिधीले धर्नासहित नाराबाजी गरेका हुन् ।
गत ६ असारमा बर्षाका कारण आवतजावत गर्न समस्या भइरहेको राजविराज–सखडा तथा सखडा– नेउर सडकको पाँच दिनभित्र मर्मत सम्भार गरिने सडक डिभिजन कार्यालय लहानका प्रतिनिधी र ठेकेदार कम्पनीले प्रतिबद्धता जनाएका थिए् ।
छिन्नमस्ता गाउँपालिकामा सडक डिभिजनका कर्मचारी सहित स्थानीय जनप्रतिनिधिको ६ असारमा बसेको बैठकले ७ असारदेखि नै आबश्यक मर्मत सम्भार गरी आबतजाबत सहज बनाउन काम शुरु गरिने निर्णय नै भएको थियो ।
त्यस अनुरुप एक महिना बित्न लाग्दा समेत निर्माण कम्पनी र सडक डिभिजन कार्यालय समेतले चासो नदिएपछि कार्यालयमै गएर आन्दोलन गरेको अध्यक्ष चौधरीले बताए ।
उनले धर्ना र नाराबाजी सांकेतिक मात्रै भएको बताउँदै अबिलम्ब निर्माण कार्य नथालिए थप आन्दोलनमा उत्रिने चेतावनी दिएका छन् ।
