राजविराज । महिला, बालबालिका तथा ज्येष्ठ नागरिक मन्त्री नवलकिशोर साहले आफूले शासक नभई सेवकको रुपमा काम गरिरहेको बताएका छन् ।
सप्तरीको तिरहुत गाउँपालिकामा समाजसेवी प्रकाश मेहताले चाडपर्वलाई लक्षित गरी आयोजना गरेको शुभकामना आदानप्रदान कार्यक्रमलाई सम्बोधन गर्दै मन्त्री साहले उक्त कुरा बताएका हुन् । कार्यक्रमका प्रमुख अतिथी रहेका मन्त्री साहले भने, ‘आगामी दिनमा समेत सेवककै रुपमा यस क्षेत्रको जनताका लागि काम गर्ने प्रतिबद्धता व्यक्त गर्दछु ।’
सबैको साथबाट नै आफू प्रतिनिधी सभा सदस्य पदमा चुनाव जितेको बताउँदै उनले आफूलाई जिताउने क्षेत्रका जनताका लागि काम गरिरहने बताए ।
मन्त्री साहले जातपातको राजनीति बन्द गर्नुपर्ने समेत बताए । ‘जातपातको राजनीतिले विकास हुँदैन्’ मन्त्री साहले भने, ‘यस्तो राजनीति कसैका लागि हितकर समेत हुँदैन् ।’
जात, वर्ग, लिङ हेरेर मतको प्रयोग गर्न नहुनेमा जोड् दिदैं उनले बालबालिकाको भविष्यको ख्याल राख्दै विकासप्रेमी उम्मेदवारलाई जिताउनुपर्नेमा जोड् दिए ।
कार्यक्रमका आयोजक प्रकाश मेहताको अध्यक्षतामा आयोजना गरिएको कार्यक्रममा जनता समाजवादी पार्टीका नेता भोला पासवान, महिला नेतृ अनुराधा साह, रामराजा स्वास्थ्य विज्ञान प्रतिष्ठानका अध्यक्ष डा. पशुपति चौधरी, सरस्वती जनता माध्यमिकका प्रधानाध्यापक रामलखन मण्डल, विद्यालय व्यवस्थापन समितिका अध्यक्ष सरस्वती कुमारी मण्डल, तिरहुत गाउँपालिकाका पूर्वउपाध्यक्ष तिर्थमाया खंगसहितकाले शुभकामना मन्तव्य व्यक्त गरेका थिए ।
कार्यक्रममा प्रमुख अतिथि मन्त्री साहले ५० जना ज्येष्ठ नागरिकलाई दोसल्ला तथा कदरपत्रबाट सम्मान गरेका थिए ।
