राजविराज । आम जनता पार्टीका अध्यक्ष प्रभू साहले मधेश केन्द्रीत दुई दलका अध्यक्षको आलोचना गरेका छन् ।
साहले जनता समाजवादी पार्टी (जसपा) नेपालका अध्यक्ष उपेन्द्र यादवलाई ‘डराएको मूसो’ र जनमत पार्टीका अध्यक्ष डा. सिके राउतलाई ‘छेपारो’ को संज्ञा दिएका हुन् ।
आईतबार बिहान राजविराजमा आयोजित पत्रकार सम्मेलनमा प्रतिनिधी सभा सदस्य समेत रहेका साहले भने, ‘अहिले जसपा नेपाल अध्यक्ष पानीमा काँपेर बसेको मूसा जस्तै अवस्थामा छन् । उनी सत्ता पक्ष कि प्रतिपक्ष अहिले चिन्नै गाह्रो भएको छ ।’
उनले रंग फेर्ने छेपारोको संज्ञा जनमतका अध्यक्ष राउतलाई दिए । ‘रबी लामिछाने पक्राउ पर्दा बिरोध गर्ने सिके राउत सत्ता पक्षमा गएर हस्ताक्षर गरे’ उनले भने ।
यद्यपी यो दुई पार्टीमा देश बनाउने, संघीयताका लागि लड्ने राम्रा नेताहरु पनि रहेको उनले बताए ।
अध्यक्ष साहले आफ्नो पार्टीको मधेश प्रदेश समितिले भ्रष्टाचारबिरुद्धको जनजागरण अभियान शुरु गरेको बताए । भ्रष्टाचार के हो ?, यसलाई हटाउन जनताको भूमिका कस्तो हुनुपर्छ ? जस्ता बिषयमा जनजागरण ल्याउन अभियान शुरु गरिएको उनले बताए ।
‘भ्रष्टाचार गर्नेलाई जनताको निगरानी छैन’ उनले भने, ‘भ्रष्टाचारबिरुद्ध जबसम्म जनताका चेतना आउँदैन, तबसम्म यो नियन्त्रण हुँदैन् ।’
आफ्नो अभियानलाई रोक्न सरकार लागिपरेको आरोप उनले लगाए । ‘राजविराज आउने क्रममा शनिबार ठाउँ–ठाउँमा रोकेर प्रहरीले अनावश्यक दुःख दिएका छन्’ उनले भने, ‘माथिल्लो आदेश भन्दै प्रहरीले यसरी दुःख दिएको पाएको बताए ।
