राजविराज । राजविराज हटियाभित्रको ‘सपिङ कम्लेक्स’ मंसिर मसान्तभित्र सम्पन्न गर्ने निर्माण कम्पनीका प्रतिनिधीले प्रतिबद्धता व्यक्त गरेका छन् ।
राजविराज नगरपालिका वडा नम्बर ७ स्थित हटियाको कम्पलेक्स सम्पन्न गर्न निर्माण कम्पनीले पटक–पटक समय लिदैं आएका छन् ।
पछिल्लो पटक प्रमुख जिल्ला अधिकारी भोला दाहालको पहलमा राजविराज नगरपालिकाका कार्यबाहक प्रमुख इसरत परबिन, वडा अध्यक्ष सुभाष यादव सहितकाले हटिया कम्प्लेक्स को अनुगमन निरीक्षण गरेका छन् । त्यस क्रममा निर्माण कम्पनीका प्रतिनिधीको पनि सहभागिता थियो ।
निर्माण कम्पनीका प्रतिनिधी मनोज यादवले मंसिर मसान्तभित्र काम सम्पन्न गर्ने जनाएको प्रमुख जिल्ला अधिकारी दाहालले बताए ।
पाँच वर्षअघि राजविराज नगरपालिकाका तत्कालीन नगरप्रमुख शम्भुप्रसाद यादवको नेतृत्वमा कम्प्लेक्स निर्माण शुभारम्भ गरिएको थियो । राजविराज–७ स्थित हटियाको एक बिघा ११ कट्ठा जग्गामा सघन सहरी विकास कार्यक्रम अन्तर्गत नगरपालिकाले प्राप्त गरेको कूल रु ३५ करोडमध्ये रु १९ करोडमा भवन निर्माण शुरु गरिएको थियो ।
निर्धारित समयमा कम्प्लेक्स भवन सम्पन्न नहुँदा हटिया वरपर जथाभावी पसलहरू सञ्चालन हुँदै आएको छ । जथाभावी सागसब्जी, किराना पसल, फलफूल, विभिन्न कस्मेटिक समान, चामल, भाँडावर्तन, दाउरा नाङ्लो बेच्ने व्यापारी अव्यवस्थित रूपमा बसेर बिक्री गर्न बाध्य छन् ।
कम्प्लेक्सको झण्डै ९५प्रतिशत काम सकिएको छ । थोरै काम सम्पन्न गर्न बाँकी रहेपनि निर्माण कम्पनी सुस्त अवस्थामा छ ।
भवन निर्माण डिभिजन कार्यालयमार्फत रसुवा रोसन जेभी निर्माण कम्पनीसँग सम्झौता भई भवन निर्माण भइरहेको छ । ठेकेदारको लापरबाहीका कारण निर्धारित समयभन्दा धेरै ढिला भइसकेको छ ।
सपिङ कम्प्लेक्स भवन निर्माण छिटो सम्पन्न नहुँदा हाल सडकमै तरकारीसहित बिभिन् सामानको बजार लाग्दै आएको छ । जसका कारण आवतजावतमा समेत समस्या भइरहेको छ ।
