राजविराज । नेपाल प्रिमियर लिग क्रिकेट प्रतियोगिता (एनपिएल) शनिबारदेखि शुरु हुँदा मधेश प्रिमियर लिग (एमपिएल) को तयारी शुरु भएको छ । एमपिएलका लागि शनिबारदेखि खेलाडीको रजिष्ट्रेशन शुरु भएको छ ।
यस पटक मधेश प्रिमियर लिगको तेस्रो संस्करणको तयारी थालिएको छ । आयोजकले शनिबार पत्रकार सम्मेलन गरी तेस्रो संस्करणको तयारी शुरु भएको जानकारी गराएको छ ।
राजविराजमा आयोजित पत्रकार सम्मेलनमा मधेश प्रिमियर लिगका अध्यक्ष इन्जिनियर संजीबनारायण यादवले प्रतियोगितका निम्ति खेलाडीको रजिष्ट्रेशन शुरु भइसकेको बताए । उनले मधेश प्रिमियम लिगको वेभसाइट तथा फेसबुक पेजबाट खेलाडीको रजिष्ट्रेशन खुल्ला गरिएको बताए ।
एक महिनासम्म खेलाडीले आवेदन दिन सक्ने उनले बताए । यसपछि अक्सन मार्फत् खेलाडीको चयन हुनेछ ।
प्रतियोगितामा १० वटा टिमलाई सहभागी गराइनेछ । राजविराज, जनकपुर, विराटनगर, बीरगंज, काठमाडौं, लुम्बिनी, टिकापुर, पोखराका साथै सप्तरीको छिन्नमस्ता र खडक टिमको सहभागिता रहने आयोजकका सचिव तिर्थ दासले बताए ।
उनका अनुसार प्रत्येक टिमका ११ खेलाडीमध्ये ७ जना पूर्व झापादेखि पश्चिम कंचनपुरसम्मका मधेशका छनौट गरिने तथा अन्य खेलाडी नेपालको बिभिन्न ठाउँबाट छनौट गरिनेछ ।
प्रतियोगिता राजविराजसहित जनकपुर र बीरगंजमा आयोजना हुने उनले बताए । ‘उद्घाटन खेल जनकपुरमा हुनेछ भने फाइनल खेल राजविराजमा हुनेछ’ अध्यक्ष यादवले भने ।
प्रतियोगिता आगामी चैत ५ गतेदेखि शुरु हुने आयोजकले जनाएको छ ।
