राजविराज । मधेश प्रदेश सरकारले प्रहरी समायोजन गराउन आन्दोलन घोषणा गरेको छ । प्रदेशका गृह तथा संचारमन्त्री भरत साहले शनिबार मन्त्रालयमै पत्रकार सम्मेलन गरी प्रहरी समायोजन गराउन आन्दोलनका कार्यक्रम सार्वजनिक गरेका छन् । उनले आईतबारदेखि प्रदेश प्रमुख कार्यालयमा धर्ना दिइने बताए । उनका अनुसार बिहान ११ देखि २ बजेसम्म प्रदेश प्रमुख कार्यालयमा धर्ना दिइनेछ । एक सातासम्म धर्ना दिएपनि सरकारले चासो नदिँदा अर्काे चरणको आन्दोलन घोषणा गरिने उनले बताए । मन्त्री साहले धर्नामा आफूसहित प्रदेशका अन्य मन्त्री र प्रदेश सांसदको सहभागिता रहने बताए । यसअघि प्रदेशका मन्त्रीहरुले गत साता प्रहरी समायोजनका निम्ति प्रधानमन्त्री शेर बहादुर देउवालाई ध्यानाकर्षण पत्र पठाउँदै आन्दोलनको अल्टिमेटम दिएको थियो । अल्टिमेटम दिएपनि संघीय सरकारले प्रहरी समायोजन गर्न ध्यान नदिएको भन्दै प्रहरी समायोजन गरी प्रदेश सरकार लाई हस्तान्तरण गर्न प्रधानमन्त्रीसँग प्रत्यक्ष भेट गरी आग्रह गरेको, आन्दोलनकै अल्टिमेटम दिदैं ज्ञापन पठाउँदा समेत ध्यान नदिएपछि आन्दोलनको घोषणा गर्नुपरेको मन्त्री साहको भनाई छ । नेपालको संविधान को धारा २६८ ले प्रदेश प्रहरी संगठनको ब्यवस्था गरेको तथा अनुसुचि ६ को कम संख्या १ मा प्रहरी, शान्ती सुरक्षा सम्बन्धी अधिकार प्रदेश सरकारको क्षेत्राधिकार भित्र रहेपनि प्रहरी समायोजन नहुँदा प्रदेश सरकारले सरकारको अनुभूति गर्न नसकिएको मन्त्री साहले बताए ।
