हात्तीले भत्कायो ७ घर

सिरहा । जंगलबाट आएका हात्तीको समूहले सिरहाको लहानमा ७ वटा घर भत्काएका छन् । लहान नगरपालिका वडा नम्बर १५ सिसवनी र मोहनपुर गाउँका घर शुक्रबार राति आएका हात्तीले भत्काएका हुन् ।
स्थानीय लक्ष्मी सदाय, शिवकुमारी सदाय, राम सदाय, श्याम कुमार सदाय, दिपेन सदाय, सरोज सदाय र कपले यादवका घर भत्काएका वडाध्यक्ष तेजनारायण चौधरीले जानकारी दिए । उनका अनुसार जंगलबाट आएका हात्तीले अन्नबाली पनि खाएका छन् । राती नै स्थानीयहरुले आगो बालेर हात्तीलाई गाउँबाट भगाएका छन् ।
वर्षातमा घर भत्काएपछि उनीहरुलाई समस्या भएको छ । स्थानीयवासीबाट जानकारी पाएलगतै मेयर महेश चौधरी पीडित समक्ष पुगेर राहत उपलब्ध गराउने प्रतिबद्धता जनाएका छन् ।