महोत्तरी । महिला कर्मचारीलाई बलात्कारको प्रयास गरेको आरोपमा प्रहरीले महोत्तरीका एक सहकारी संस्थाका प्रबन्धकलाई पक्राउ गरेको छ ।
पक्राउ पर्नेमा महोत्तरीको सोनमा गाउँपालिका ७ बस्ने ३५ बर्षीय शत्रोद्यन यादव छन् । उनी गौशला नगरपालिका ५ स्थित प्रभु बचत तथा ऋण सहकारी संस्थाका प्रबन्धक हुन् ।
यादवले २० वर्षीय महिला कर्मचारीसँग मंगलबार साँझ बलात्कारको प्रयास गरेको भन्दै इलाका प्रहरी कार्यालय गौशलामा परेको उजुरीको आधारमा पक्राउ गरिएको प्रहरीले जनाएको छ ।
सहकारीमा ड्युटीको समयमा ती महिला कर्मचारीलाई खाता खोल्नुपर्ने कार्य छ भनि आफ्नो घर मै बोलाएर बलात्कार प्रयास गरेको भनि पीडितले जनाएकी छिन् ।
पीडित महिलाले आफू माथि संस्थाबाट लिएको पेश्की बापतको १३ हजार ५ सय रकम मिनाहा गरिदिने प्रलोभन समेत दिएर जबरजस्ती गर्न खोजेपनि आफू प्रतिकार गर्दै त्यहाँबाट भागेर इलाका प्रहरी कार्यालय पुगेर उजुरी दिएकी बताईन् ।
पीडितको स्वास्थ्य परिक्षण प्राथमिक स्वास्थ्य केन्द्र गौशला मै मंगलवार नै गरिएको प्रहरीले जनाएको छ ।
