परिष कर्ण
राजविराज । सप्तरी सदरमुकाम राजविराज नगरपालिका वडा नम्बर २ राजदेवी चोकमा नेपाल प्रहरीको बिट छ । त्यो बिट आसपास क्षेत्र सुरक्षित हुनुपर्ने हो । तर बिट नजिकै एउटा घरमा आईतबार राति चोरी भएको छ ।
स्थानीय श्याम देवको घरमा चोरी भएको हो । मुख्य गेटबाट हाम फालेर गएका चोरले एउटा कोठामा सुतेका ५६ बर्षीय देवलाई बाहिरबाट थुनेर बाँकी रहेको दुई कोठाबाट चोरी गरेका हुन् ।
चोरहरुले बाँकी दुई वटा कोठाको चार वटा दराज तोडफोड गरेर गरगहना र नगद चोरी गरेका छन् । चोरहरुले दराजको लकरको ताल्चा फुटाएर १० तोला सुनको गहना, एक किलो चाँदीको गहना र नगद २५ हजार लगेका छन् । कपडाहरु भुईमै फालिएको छ ।
देव घरमा एक्लै थिए । उनी राति खाना खाएर आफ्नो कोठामा सुत्न गएको अवस्थामा चोरी भएको हो । बिहान उठेर ढोका खोल्दा बाहिरबाट चुकुल लागेको थाहा पाएका थिए । झ्यालबाट हल्ला गर्दा छिमेकीले आएर ढोका खोलिदिए । आफुले राति सबै ढोका बन्द गरेको थिए । कसले कतिबेला खोले आफुले थाहा नपाएको उनले बताएका छन् ।
राजदेवी चौक को प्रहरी विट अगाडि बाटै चोरी हुनु दुःखद घटना भएको स्थानीयले बताएका छन् । राजविराजमा पछिल्लो पटक चोरीको घट्ना हवात्तै बढेको छ ।
