राजविराज । सप्तरीका प्रतिनिधी सभा सदस्यहरुले जिल्लाको समस्याको बारेमा सरकारको ध्यानाकर्षण गराएका छन् ।
मंगलबार बसेको प्रतिनिधी सभा बैठकको शून्य समयमा बोल्दै जिल्लाबाट प्रतिनिधित्व गरेका दुई सांसदले जिल्लाको समस्याको बारेमा सरकारलाई अवगत गराएका हुन् ।
समानुपातिक सांसद खगेन्द्र कर्णले जिल्लामा कृषिको अवस्था कहालिलाग्दो रहेको बताए । जिल्लमा ६७ हजार २९१ हेक्टर खेतीयोग्य जग्गा रहेपनि ४५ हजार २४ हेक्टर जग्गा मात्रै सिंचित भइरहेको बताए । उनले अहिले पनि किसान आकाशे पानीको भरमा रहेको बताए ।
सिंचाईसँगै मल नपाउने, उन्नत जातको बिऊको अभाव, सहुलियत ऋणमा पहुँच नहुने जस्ता समस्याले कृषि थलिएको छ’ उनले भने, ‘हामी परिवर्तनको नारा लिएर आएका हौं । अब परिणाम देखाउने समय हो । त्यसैले सरकारसँग आग्रह गर्दछु । सिंचाईको विस्तार व्यवस्थापन गरियोस्, बिऊविजन किसानसम्म पुर्याऔं, समयमै मलको आपूर्ती गरौं र सहुलियत ऋणको व्यवस्था गरौं ।’
हामी भाषण दिन नआएको र परिणाम दिन आएको बताउँदै उनले भने, ‘यी आधारभूत कामहरु गरिए सप्तरीसँगै पुरै देशकै कृषि धेरै मजबुत हुन्छ ।’
मंगलबारकै बैठकमा अर्का समानुपातिक सांसद डा. अंकिता ठाकुरले पनि जिल्लाको समस्याबारे सरकारको ध्यानाकर्षण गराइन् ।
राजविराजमा महिला छात्राबास निर्माण भएको २० बर्ष पुगिसक्दा पनि अधुरो रहेको भन्दै उनले यसका कारण महिला विद्यार्थी ठूलो पीडामा रहेको उल्लेख गरिन् ।
गजेन्द्रनारायण सिंह अस्पताल भवन निर्माण सम्पन्न भइसक्दा समेत हस्तान्तरण नहुँदा बिरामीहरु अझै प्यासेज र भुइँमा उपचार गराउन बाध्य भएको र करोडौंको लगानीमा निर्माण सम्पन्न भएको राजविराज बसपार्क अझै संचालनमा आउन नसकेको बताइन् ।
‘यी विषयहरु मात्र पूर्वाधार होइन्, जनताको दैनिक जीवनसँग प्रत्यक्ष जोडिएका आधारभूतका विषय हुन्’ उनले भनिन्, ‘मलाई विश्वास छ कि यो समस्याको समाधान चाँडै हुनेछ र सप्तरीका जनतालाई राहत महसुस हुनेछ ।’
