चुनावको समयमा गरिएका प्रतिबद्धताहरु पूरा गर्न आफू तत्पर छु : सांसद चौधरी

राजविराज । प्रतिनिधी सभा सदस्य अमरकान्त चौधरीले चुनावको समयमा गरिएका प्रतिबद्धताहरु पूरा गर्न आफू तत्पर रहेको बताएका छन् । उनले ती कामहरु गर्न योजना बनाउने काम शुरु गरिसकेको बताएका छन् ।
डाक्नेश्वरी नगरपालिकास्थित आफ्‌नै निवासमा नयाँ वर्ष तथा जुडशितल पर्वको अवसरमा बुधबार शुभकामना आदान प्रदान तथा सरोकारवालासँगको छलफल आयोजना गर्दै चौधरीले यस्तो बताएका हुन् ।
उनले सबै समस्या एकै पटक समाधान गर्न नसकिने बताउदै पालै पालो समस्याहरु समाधान गर्दै जाने बताए । आफू सधैं जनताको पक्षमा रहने बताउँदै उनले सुशासनको अनुभूति, शिक्षा र स्वासथ्यलाई राम्रो बनाउन पहल गर्ने बताए ।
कार्यक्रममा कार्यालय प्रमुखलाई बोलाएपनि नआउँदा योजनाहरु प्रवाह गर्न नसकिएको बताउँदै उनले जिल्ला प्रशासन, जिल्ला प्रहरीसहित जनताको प्रत्यक्ष सम्बन्ध राख्ने कार्यालयलाई छिटो, छरितो सेवा प्रवाह गर्न उनले आग्रह गरे ।
सांसद चौधरीले जिल्लाबाट निर्वाचित र समानुपातिक सबै सांसदको एउटा सामूहिक बैठक आयोजना गरिने र त्यसमा जिल्लाका हरेक कार्यालयका प्रमुखलाई राखेर छलफल गरिने बताए । आफूहरुले गर्ने काममा सबैलाई सहयोग गरिदिन उनले आग्रह गरे ।
हाल सरकारले सीमा क्षेत्रबाट एक सय रुँपैया भन्दा बढीको सामान ल्याउँदा भन्सार शुल्क तिरेर ल्याउनु पर्ने व्यवस्थाले राजश्व संकलन बृद्धि हुने भएपनि छोटी भन्सार कार्यालय संचालन नहुँदा मुख्य भन्सार पुगेर दुई सय मुल्य बराबर सामानको भन्सार कटाउन दुई सय देखी तीन सय रुँपैयासम्म गाडी भाडा तिर्नुपर्ने अवस्था रहेको कार्यक्रममा सहभागि उपभोक्ता र उद्योगि व्यवसायीले गुनासो पोखेका थिए ।
कार्यक्रममा सप्तरी उद्योग बाणिज्य संघका अध्यक्ष लालुप्रसाद अग्रवाल तथा नेपाल उद्योग बाणिज्य महासंघका केन्द्रिय सदस्य अरुण प्रधानले सबै छोटी भन्सार कार्यालयहरु बन्द हुँदा उपभोक्ता र उद्योगी व्यवसायी दुबै मारमा परेको ध्यानाकर्षण गराएपछि सांसद चौधरीले छोटी भन्सारका लागि आवश्यक पहल तत्कालै शुरु गरिने प्रतिबद्धता जनाए ।
सांसद चौधरीले आफ्‌नो पहिलो प्राथमिकता जनताको काम र जिल्लाको समग्र विकास रहेको भन्दै पर्व, त्योहार र बिदालाई जनहितमा प्रयोग गर्ने सोच बनाएको बताए ।
कार्यक्रममा नेपाल पत्रकार महासंघ सप्तरीका अध्यक्ष श्रवण देव, घरेलु तथा साना उद्योग कार्यालयका प्रमुख रेखा यादव, रास्वपाका नेता अमरकान्त झा, सरोज मण्डल, उपेन्द्र साह, भुपेन्द्र चौधरी, प्रमोद कुमार यादव, धनाई मण्डल, शिवराम साह लगायतले पनि जिल्लाको समस्या उठान तथा आ–आफ्‌ना सुझावसहित नव वर्ष तथा जुडशितल पर्वको शुभकामना दिएका थिए ।