दुबै सदनबाट पारित भएको नागरिकता विधेयक पारित नगरेको भन्दै राजविराजमा राष्ट्रपति विद्यादेवी भण्डारीको पुत्ला जलाइएको छ ।
जनता समाजवादी पार्टी (जसपा) निकट जनवर्गीय संगठनद्वारा मंगलबार राजविराजमा प्रदर्शन गर्दै राष्ट्रपति भण्डारीको पुत्ला जलाइएको हो । जसपा आवद्ध महिला, युवा विद्यार्थीद्वारा प्रदर्शन गर्दै भण्डारीको पुत्ला जलाएका छन् ।
स्थानीय जनआन्दोलन चोकमा पुतला जलाउने क्रममा प्रहरीले रोक्न खोज्दा प्रहरी र प्रदर्शनकारीबीच घम्साघम्सी भएको थियो । जलिरहेको पुत्ला प्रहरीले खोस्ने क्रममा युवा अध्यक्ष शिवम यादव र महिला नेतृ उषा देव यादव घाईते भएको युवा संघका केन्द्रिय सचिब विशाल यादवले जानकारी दिए ।
पुत्ला दहनपछि आयोजना गरिएको कोण सभालाई सम्बोधन गर्दै बक्ताहरुले लाखौं नेपाली जनतालाई नागरिकताबिहीन बनाएको भन्दै राष्ट्रपति भण्डारीको राजीनामा माग गरे । उनीहरुले संसदबाट दुईपटक पारित भएको नागरकिता ऐन सम्बन्धि विधेयक प्रमाणीकरण नगरी नेपालको संविधान उल्लंघन गर्ने राष्ट्रपति भण्डारीले राजिनामा नदिए थप सशक्त आन्दोलन गर्ने चेतावनी दिए ।
समाजवादी युवा संघ सप्तरीका अध्यक्ष शिवम यादवको अध्यक्षतामा आयोजित कोणसभामा कोणसभामा जसपा केन्द्रिय सदस्य रमिला साह, महिला नेतृ सावित्री पंडित, समाजावादी युवा संघका प्रदेश उपाध्यक्ष भुवनेश्वर यादव (थापा), जिल्ला उपाध्यक्ष केदार यादव, समाजवादी विद्यार्थी युनियन सप्तरीका उपाध्यक्ष अनिल कुमार साह लगायतले मन्तव्य व्यक्त गरेका थिए ।
त्यसअघि स्थानीय शिव मन्दिरबाट निकालिएको विरोध जुलुस राष्ट्रपति भण्डारी विरुद्ध चर्को नारा लगाउदै राजविराज नगरपालिकाको विभिन्न भाग परिक्रमा गरेको थियो । त्यस क्रममा ‘संविधान उल्लंघन गर्ने राष्ट्रपति विध्यादेवी भण्डारी राजीनामा गर, कठपुतली राष्ट्रपति भण्डारी मुर्दावाद, नागरिकता ऐन सम्बन्धि विधेयक प्रमाणीकरण गर, महिला, विद्यार्थी युव लगायतका सम्पुर्ण उत्पीडित समुदाय एक होऔं, विद्या तेरो पाराले दुख पाए साराले’ जस्ता नारा लगाएका थिए ।
