राजविराज । विश्व पर्यटन दिवसको अवसर पारेर सप्तरीमा विविध कार्यक्रमको आयोजना गरिएको छ । काठमाडौंबाट जहाजमा राजविराज आएका यात्रु, हनुमाननगर कंकालिनी नगरपालिका १ स्थित कंकालिनी मन्दिरमा आएका श्रद्धालुलाई स्वागत गर्दै पर्यटन सम्बन्धी अन्तरकृयाको आयोजना गर्दै यो दिवस मनाइएको छ ।
मन्दिरमा आएका धार्मिक पर्यटकलाई दशैंको शुभकामनासहित माला, खादा ओढाएर मिठाइ बितरण गरिएको होटेल तथा पर्यटन संघ सप्तरीका अध्यक्ष शैलेश चौधरीले जानकारी दिए ।
त्यस अवसरमा अध्यक्ष चौधरीसहित हनुमाननगर कंकालिनी नगरपालिकाका प्रमुख बिरेन्द्र माझी, उप प्रमुख सरिता यादवसहितको उपस्थिति थियो ।
यस्तै, काठमाडौबाट जहाजमा राजविराज आएका यात्रीलाई फुलको मालासहित स्वागत गरिएको चौधरीले बताए ।
त्यस्तै,सप्तरीमा पर्यटनको बिकासको संम्भावना, संरक्षण र प्रचारप्रसार बारे गोष्ठीको आयोजना गरिएको छ ।
प्रमुख जिल्ला अधिकारी भुपेन्द्र थापाको अध्यक्षतामा आयोजित कार्यक्रममा एसपी अविनाराययण काफ्ले, मधेस उधोग बाणिज्य संघका वरिष्ठ उपाध्यक्ष अरूण प्रधान, निर्माण ब्यबसायी संघका अध्यक्ष एनेश्वर दास, ईट्टा उद्योग व्यवसायी संघका अध्यक्ष दुर्गानन्द साहसहितकाले मन्तव्य व्यक्त गरेका थिए । होटल तथा पर्यटन ब्यबसाय संघद्वारा कार्यक्रमको आयोजना गरिएको थियो ।
