मधेश सम्वाददाता
राजविराज, ७ बैशाख ।
फैसला भएको कैद र जरिवाना फछ्र्याैटमा सकृयता देखाएको भन्दै सप्तरी जिल्ला अदालतले दुई जना प्रहरी निरीक्षकलाई सम्मान गरेको छ ।
ईलाका प्रहरी कार्यालय कडरबोना सप्तरीमा कार्यरत प्रहरी निरीक्षक विरेन्द्र कुमार पासवान र ईलाका प्रहरी कार्यालय कल्याणपुरमा कार्यरत प्रहरी निरीक्षक उमाशंकर प्रसाद साहलाई जिल्ला अदालतले बुधबार सम्मान गरेको हो । अदालतका जिल्ला न्यायाधीश चन्द्रमणी ज्ञवालीले उनीहरुलाई कदरपत्र प्रदान गर्दै सम्मान गरे ।
विभिन्न अदालत र न्यायधीकरणको फैसला बमोजिम ठहर भएको कैद जरिवाना असूल फ्र्छर्याैटका क्रममा सक्रियता देखाएको भन्दै उनीहरुलाई सम्मान गरिएको ज्ञवालीले बताए ।
अदालतले गरेको फैसला कार्यान्वयनका लागि प्रहरी निरीक्षक पासवानले २०७७ असोज ११ गते देखि हाल सम्ममा ४५९ जना फरार प्रतिवादीलाई पक्राउ गरेका छन् । उनीहरुको जम्म कैद ८० वर्ष ५ महिना २१ दिन रहेको छ भने एक करोड छ लाख ३४ हजार बराबरको माल समान भन्सारमा बुझाईएको ईलाका प्रहरी कार्यालय कडरवोनाले जनाएको छ । हराएरको मानिस २१ जना, ट्रक १ थान, पिकअप ३, मोटरसाईकल १, ट्याकटर १ र हराएको मोवाईल ३३ थान लगायतका सामानको खोजी गरी सम्बन्धित व्यक्तिलाई बुझाइएको पासवानले बताए ।
प्रहरी निरीक्षक साहले २०६ जना फरार प्रतिवादीलाई पक्राउ गरी अदालतको फैसला कार्यान्वयनमा सघाएका छन् ।
यसअघि सप्तरीमा लागुऔषध नियन्त्रणमा उत्कृष्ट काम गरेको वापत आईडिया नेपाल नामक गैर सरकारी संस्थाले दुबैलाई प्रसंशा पत्र सहित सम्मान गरेका थिए ।
कदरपत्र प्राप्त गर्दै प्रहरी निरीक्षक पासवानले सप्तरीमा कार्यरत रहँदा पाएको सम्मानले थप जिम्मेवार भएर काम गर्ने हौसला प्रदान गरेको बताए । उनले न्याययिक निकायबाट कदर पत्र पाएपछि गौरवान्ति भएको प्रतिक्रिया दिए । यस्तै अर्का प्रहरी निरीक्षक साहले न्याय गर्ने अदालतले आफूलाई सम्मान दिने योग्य ठानेकोमा सप्तरी जिल्ला अदालत प्रति अभार प्रकट गरे । उनले प्रहरी सेवामा रहँदा प्रहरीलाई राज्यले प्रदान गरेको जिम्मेवारी इमान्दारीपूर्वक निर्वाह गर्ने प्रतिवद्धता जनाए ।
