राजविराज । प्रहरीले मोटरसाइकल चोरीमा संलग्न ६ जनालाई सर्लाहीको लालबन्दीबाट पक्राउ परेको छ । पक्राउ पर्नेमा एक जना सप्तरीका समेत छन् ।
रौतहटको चन्द्रनिगाहपुरबाट दुईवटा मोटरसाइकल चोरी गरेर ल्याउने गिरोहका उनीहरुलाई पक्राउ गरिएको प्रहरीले जनाएको छ ।
सप्तरीको रुपनी गाउँपालिका १ का १९ बर्षीय सिद्धार्थ महतो, सर्लाहीको लालबन्दी नगरपालिका–७ स्थित बजारमा ग्यारेज सञ्चालन गर्ने लालबन्दी ११ का २९ बर्षीय रामवरण महतो, ईश्वरपुर नगरपालिका १३ का १८ बर्षीय श्याम महतो, लालबन्दी ७ का १८ वर्षीय नजरेल नदाव, ईश्वरपुर नगरपालिका ६ का २० बर्षीय जस्मिन खान र उनका भाई १७ वर्षीय सागिर खानलाई पक्राउ गरिएको प्रहरीको भनाई छ ।
उनीहरुको समूहले यही वैशाख १९ गते चन्द्रनिगाहपुरबाट प्रदेश २–००५ प ९४२५ र ना ४६ प ६२४७ नम्वरको मोटरसाइकल चोरी गरेको थियो । चोरी भएको मोटरसाइकलसहित उनीहरुलाई पक्राउ गरिएको इलाका प्रहरी कार्यालय लालबन्दीका निमित्त प्रमुख एवं प्रहरी नायब निरीक्षक (सइ) भिमराज सुवेदीले जानकारी दिए ।
चन्द्रनिगाहपुरबाट मोटरसाइकल चोरी गर्ने तीन जनालाई चन्द्रनिगाहपुरमै पठाएर कारवाही अघि बढाइएको छ । यहाँ बसेर चोरीको मोटरसाइकल बेचाउने कार्यमा संलग्न तीन जनालाई लालबन्दी प्रहरीकै हिरासतमा राखेर अनुसन्धान भइरहेको प्रहरी नायब निरीक्षक सुवेदीले बताए ।
