राजबिराज ।
राजविराज नगरपाालिकाको हटियामा तत्काल नाला निर्माण नहुने भएको छ । यहाँ निर्माण भइरहेको हटिया गिलेसनको अन्य काम गराएपछि मात्रै नाला निर्माण भएको हो ।
नगरपालिकाका कार्यबाहक मेयर इसरत परबिनले पहिला नै नाला निर्माण गर्न सघन शहरी तथा भवन निर्माण आयोजनालाई पत्र लेख्न लगाएकी थिइन् । जसको नगरपालिकाका वडाअध्यक्ष र कार्यपालिका सदस्यले बिरोध जनाएका थिए ।
वडा अध्यक्ष र कार्यपालिका सदस्यहरुले पहिला हटियामा अतिक्रमण भएको जग्गा फिर्ता गराई त्यसपछि मात्रै रोड र नाला बनाउनुपर्ने माग गरेका थिए । उनीहरुले नगरपालिकाभित्रको अतिक्रमित जग्गा हटाउन २७ मंसिर २०७९ मै सर्वसम्मत निर्णय भइसकेपनि कार्यबाहक मेयर यो निर्णय उल्टयाउँदै पहिला नाला र रोड निर्माण गर्न पत्राचार गराएको भन्दै बिरोध गरेका थिए ।
कार्यबाहक मेयरले निर्णय उल्टाएर यस्तो पत्राचार गरेको पाइएपछि वडा नम्बर ७ का अध्यक्ष सुभास यादवले सघन शहरी कार्यालयमा पत्राचार गरेका थिए ।
सघन शहरी तथा भवन निर्माण आयोजना कार्यालयले नगरपालिकाको वडा नम्बर ७ को कार्यालय तथा सरोकारबाला समेतको अनुरोध मा हटियामा तत्काल नालाको निर्माण कार्य नगर्न ठेकेदार कम्पनीलाई पत्र पठाएको छ ।
कार्यालय प्रमुख सचिन्द्र कुमार देवले ठेकेदार कम्पनी रसुवा÷रोशन जे.भी कम्पनीलाई पत्र पठाउँदै तत्काल नालाको निर्माण कार्य नगरी हटिया क्षेत्रभित्रको बाँकी रहेको भवन, सटर रंगरोगन लगायतका अन्य कार्यहरु द्रूत गतिमा अगाडि भनिएको छ ।
