विनय कर्ण
राजविराज, ८ असार । हनुमाननगर कंकालिनी नगरपालिका वडा नम्बर ४ स्थित मधवापुर मैदान बिहीबार दर्शकले खचाखच भरिएको थियो । तर, त्यहाँ सधै झैं भईरहने कुनै नियमित हुँदै आएका खेल भने भईरहेको थिएनन् ।
मैदानमा मेची देखि महाकाली सम्मका ३२ जिल्लाबाट आएका ६८ जना युवाहरुको स्वयंसेवक दस्ताले युद्ध कौशल, दण्ड, व्याम र खेल प्रदर्शन गरिरहेका थिए । त्यही दृष्य अवलोकन गर्न आएका थिए सैयौं दर्शक । त्यहाँको दृष्य पनि सेना प्रहरीले खेल्ने परेड जस्तै देखिन्थ्यो ।
विश्व हिन्दु स्वयंसेवक संघ नेपालले संघ शिक्षा वर्ग प्रथम बर्ष २०८० अन्तर्गत १२० जना युवाहरुलाई युद्ध, दण्ड र व्याम संगै व्यत्तित्व निर्माण सहितका विषयमा मधवापुरमै २० दिनको प्रशिक्षण दिएर स्वयंसेवक दस्ता तयार पारि समापन समारोहको आयोजना गरेर उनीहरुले सिकेका काला कौशल प्रदर्शन गर्न लगाएका हुन् ।
समापन समारोहका प्रमुख अतिथि सप्तरी क्षेत्र नम्बर १ का प्रतिनिधिसभा सदस्य नवल किशोर साहले भरखरका युवाहरुले २० दिनको प्रशिक्षणमा प्राप्त गरेको दण्ड, युद्ध कौशल देखि व्यत्तित्व निर्माण सम्मको शिक्षाले उनीहरुको जिवनमा परिवर्तन ल्याउने विश्वास व्यक्त गरे ।
उनले ३२ जिल्लाबाट आएर १२० जना युवाहरु कठोर मिहनेत गरेर छोटो समयमा सिकेको ज्ञान सीप प्रत्यक्ष रुपमा हेर्न पाउँदा आफूलाई खुशी लागेको बताए । “आफ्नो निर्वाचन क्षेत्रमा यस्तो उपलब्धिमूलक कार्यक्रमको आयोजना गर्ने विश्व हिन्दु स्वयंसेवक संघ नेपाल प्रति आभार र धन्यावद ज्ञापन गर्दछु” साहले भने ।
यस्तै राष्ट्रिय स्वयंसेवक संघ भारतका संघ प्रचारक आलोकले आफू मिथिलाको पावन भूमीमा पहिलो पटक आएको र यहाँको पवित्र भूमीमा स्वयंसेवकहरुले प्रशिक्षण लिएर संघको प्रचारक बन्नु गौरवको विषय भएको बताए । उनले हिन्दु धर्म दर्शनमा उपचार देखि युद्ध सम्म र व्यक्तित्व निर्माण देखि पृथ्वीमा भएको सबै चराचरको रक्षासम्मको कुरा उल्लेख रहेको बताउँदै प्रशिक्षण प्राप्त गरेका युवाहरुलाई सकारात्मक काममा लाग्नुका साथै समाजलाई सकारात्मक दिशामा अगाडी बढाउने काममा लाग्न आग्रह गरे ।
हिन्दु स्वयंसेवक संघ धनकुट्टाका विश्वनाथ दहालले स्वयंसेवक संघले प्रत्येक बर्ष देशको विभिन्न स्थानमा यस्तो कार्यक्रमलाई निरन्तरता दिदै आएको जानकारी दिए । उनले युवाहरुलाई प्रशिक्षण दिएर स्वयंसेवक र प्रचारक बनाई विश्वका सबै मानव जातिको र क्षाका लागि काम भईरहेको बताए । “सर्वे भवन्तु सुखिनः सर्वे सन्तु निरामयाः संघको मूल उद्देश्य रहेको छ । हामी हिन्दुका लागि मात्र नभई विश्वका सबै मानव जातिको पक्षमा काम गरिरहेका छौं” दहालले भने ।
