राजविराज । अत्यधिक रक्तस्रावसँगै सप्तरीकी एक गर्भवती महिलाले ६ महिनामै बच्चा जन्माएकी छन् ।
राजविराज नगरपालिका वडा नम्बर २ राजदेवी टोल निवासी अकबरकी २२ बर्षकी पत्नी समसुलिया खातुनको गर्भमा रहेको बच्चा समय अगावै ६ महिनामै जन्मिएको छ । गर्भवती समसुलियालाई गत जेठको पहिलो साता अत्यधिक रक्तस्राव हुन लागेको थियो । उनलाई तत्कालै राजविराजस्थित युनिक सिटी हस्पिटलमा भर्ना गर्न ल्याएको केही बेरमै बच्चा निस्कियो ।
’सामान्यतया ४० हप्तामा बच्चा जन्मिने गर्छ । तर २४ हप्तामै यो बच्चा जन्मियो’ युनिक सिटि अस्पतालका बाल चिकित्सक डा. राजन जयसवालले भने, ’ बच्चाको तौल पनि ७५० ग्राम मात्रै थियो ।’
२४ हप्तामा जन्मिएको छोरी शिशुको फोक्सोको विकास समेत हुन सकेको थिएन । जसका कारण बच्चालाई साँस लिन समस्या थियो ।
कम्तीमा ३४ हप्तामा मात्रै बच्चाको फोक्सोको विकास हुन्छ’ डा. जयसवालले भने, ’बाँच्नै सक्ने स्थिति थिएन । यस्ता केसलाई ठूला अस्पतालमा पनि बचाउन गार्है हुन्थ्यो ।’
जन्मिएको बच्चालाई १ महिना सिटि अस्पतालको इन्क्यूभेटरमा राखेपछि अहिले सामान्य अवस्थामा फर्किएको छ । बच्चाको तौल पनि बढेको छ । अहिले १ किलो तौल भएको डा. जयसवालले बताए ।
बच्चाकी आमा समसुलियाले अहिले बच्चाले दूध खान थालेको बताइन् ।
’गरीव परिवारका समसुलियाको बच्चालाई उपचार गर्दा अस्पतालले रकम मिनाहा गरेका छन् । १ महिनाको उपचार खर्च २ लाख रुपैयाँ भयो’ डा. जयसवालले भने, ’ अस्पताललाई उनीहरूले ९० हजार मात्र तिरेको र अरु छुट दिइएको छ ।’
