राजविराज । नेपाल पत्रकार महासंघ, सप्तरीले पालिका तथा सरकारी कार्यालयहरुमा मिडियाको नाममा जथाभावी बिल पेश गर्ने र भुक्तानी नपाएपछि तथ्यहिन कुरा जोडेर युट्युवसहितका सामाजिक सञ्जालमा प्रकाशन÷प्रशारण भइरहेको कार्यप्रति हाम्रो गम्भीर ध्यानाकर्षण भएको जनाएको छ ।
बिल दिएर भुक्तानी माग्ने र नपाएपछि आधारहिन कुरा जोडेर भिडियो बनाउने, सामाजिक सञ्जालमा लेख्ने कार्य भइरहेको प्रमाणसहित कतिपय कार्यालयले उपलब्ध गराएको महासंघले जनाएको छ । ‘पत्रकारिता गर्दै नगर्ने, अनि भिडियो मात्रै खिचेर सामाजिक सञ्जालमा पोष्ट गर्ने व्यक्ति ’पत्रकार’को परिभाषाभित्र नपर्ने गरेको सबैलाई जानकारी नै छ’ महासंघले बुधबार बिज्ञप्ती जारी गर्दै फेसबुक, युट्युव, टिकटकसहितका सामाजिक सञ्जाल सञ्चारमाध्यम(मिडिया) नभएको पनि सबैमा अवगत भएकै विषय हो ।’
यस्ता काममा संलग्न जो कोहिलाई पनि सचेत हुन आग्रह गर्दै बिज्ञप्तीमा यसपछि पनि यस्ता कार्य दोहरियो भने त्यस्ता दोषी ब्यक्तिमाथि कार्वाही गराउन पत्रकार महासंघ सप्तरी शाखा अग्रसर हुने उल्लेख गरिएको छ ।
सप्तरीको पत्रकारिता क्षेत्र इमान्दारीपूर्वक आफ्नो भूमिका निर्वाह गरिरहेको अवस्थामा केहि युट्युव र अनलाइनमा काम गर्ने व्यक्तिले समग्र पत्रकारिता क्षेत्र बदनाम गराउने दुस्साहस गरेको अध्यक्ष श्रवणकुमार देव र सचिव रामनारायण विश्वासद्धारा जारी बिज्ञप्तीमा उल्लेख गरिएको छ ।
‘अर्कोतर्फ, सप्तरीका पालिका तथा सरकारी कार्यालयहरुलाई पत्रकार महासंघले यसअघि नै समानुपातिक विज्ञापन प्रणाली लागु गर्न पटक–पटक छलफल गर्दा पनि पालिका र सरकारी कार्यालयहरुकै उदासिनताले लागु हुन नसक्दा अहिलेको स्थिती उत्पन्न भएको पनि महासंघको निष्कर्ष छ’ बिज्ञप्तीमा भनिएको छ, ‘त्यसैले यसतर्फ पालिका प्रमुख (जनप्रतिनिधि), पालिकाका प्रमुख प्रशासकीय अधिकृत र अन्य सरकारी कार्यालयका प्रमुखहरुलाई निकट भविष्यमा यसतर्फ गम्भिर हुन पत्रकार महासंघको सुझाव छ ।’
