राजविराज । नागरिकता सम्बन्धी कसुर मुद्दामा पक्राउ पूर्जी जारी भएपछि सप्तरीको डाक्नेश्वरी नगरपालिकाकी उप प्रमुख मीरा कुमारी यादव प्रहरी कार्यालयमा हाजिर भएका छन् ।
बुधबार दिउँसो उनी नेकपा एमालेका नेता÷कार्यकर्तासहित राजविराजस्थित जिल्ला प्रहरी कार्यालय, सप्तरीमा हाजिर भएका हुन् । पूर्व सांसद सरिता गिरीसहित नेकपा एमालेका जिल्लास्तरीय नेताहरु उप मेयर यादवलाई लिएर प्रहरी कार्यालय आएका हुन् ।
उच्च अदालत जनकपुर, राजविराज इजलासको परमादेशपछि प्रहरीले गत आईतबार उप मेयर यादव र उनका पति महेन्द्र यादवबिरुद्ध नागरिकता सम्बन्धी कसुरमा मुद्दा दर्ता गरेको छ । मुद्दा दर्ता गरेपछि जिल्ला अदालतबाट मंगलबार पक्राउ पूर्जी जारी गरिएको छ ।
उपमेयर मीरा र उनका पति महेन्द्र भारतको बिहार राज्यअन्तर्गत मझारी ग्राम, थाना निर्मली, पञ्चायत मझारी, अञ्चल निर्मली, जिल्ला सुपौल निवासी रहेको दाबी गर्दै डाक्नेश्वरी नगरपालिका वडा नम्बर ४ निवासी कृष्णकुमार यादवले मुद्दा दायर गरेका थिए ।
भारतीय नागरिक मीरा नेपालको नागरिकता लिई उप प्रमुख समेत बनेको र प्रहरी, प्रशासनले मुद्दा दर्ता गर्न नमानेको भन्दै कृष्णकुमारले यसअघि जिल्ला प्रशासन र प्रहरी कार्यालय धाउँदा समेत मुद्दा दर्ता गरिएको थिएन् ।
जिल्ला प्रहरी कार्यालयमा उप मेयर हाजिर भएपनि उनका पति भएनन् । उनी फरार भएको र खोजी भइरहेको प्रहरीले जनाएको छ । उप मेयरलाई जिल्ला प्रहरी कार्यालयमा राखी अन्य अनुसन्धान शुरु गरिने प्रहरीले जनाएको छ ।
२०७९ बैशाखमा भएको स्थानीय तहको निर्वाचनमा उनी नेकपा एमालेबाट उप मेयरमा निर्वाचित भएकी थिइन् ।
