राजविराज । केहि दिनअघि पालिकाले स्पष्टिकरण सोधेपछि सप्तरीको बिष्णुपुर गाउँपालिकाका शिक्षक आन्दोलनको घोषणा गरेका थिए । पालिका अध्यक्ष उमेश कुमार यादवले सामुदायिक विद्यालयमा अध्ययनरत बालबालिकालाई पढ्न लेख्न नआएको र शिक्षकले पढाईनरहेको भन्दै स्पष्टिकरण सोधेका थिए । यो प्रकरण केहि शिथिल भएपछि संचारकर्मीको एक टोलीले गाउँपालिकाको वडा नम्बर १ स्थित जनता मावि खुरहुरियाको अनुगमन गरेका छन् ।
अनुगमनका क्रममा यो विद्यालयमा देखिएका केहि दृश्यहरु । सबैभन्दा पहिला विद्यालयको रजिष्टरमा विद्यार्थीको संख्या र कक्षामा उपस्थित विद्यार्थीबारे चर्चा गरौं ।
गत बिहीबार संचारकर्मीको टोली पुग्दा बालविकास केन्द्रमा एक जना शिक्षिका आफ्ना बच्चासहित र अर्काे खाली बसिरहेकी थिइन् । बालविकास केन्द्रमा एक जना पनि बालबालिका थिएनन् । जबकी रजिष्टरमा ३१ जना अध्ययनरत रहेको देखियो ।
कक्षा १ को रजिष्टरमा ४२ जना बालबालिका देखिएपनि एक जना पनि थिएनन् । कक्षा २ मा २५ जना रहेको देखिएपनि कक्षामा कोहि पनि देखिएनन् ।
यस्तै, कक्षा ३ को रजिष्टरमा २९ जना देखिएकोमा ४ जना मात्रै उपस्थित, कक्षा ४ को रजिष्टरमा २९ जना देखिएपनि ३ जना मात्रै उपस्थित, कक्षा ५ को रजिष्टरमा २७ जना देखिएपनि २ जना मात्रै उपस्थित, कक्षा ६ को रजिष्टरमा ५८ जना रहेकोमा ९ जना मात्रै उपस्थित देखिए ।
त्यस्तै, कक्षा ७, ८, ९ र १० पनि रजिष्टरमा उल्लेख भए अनुसार विद्यार्थी देखिएनन् ।
यसबारे शिक्षकको धारणा थियो विद्यार्थी टिफिनमै गइहाल्छन् हामी के गर्ने ?
यसमा प्रधानाध्यापक अशोक यादवले थपे, ‘खाजा कार्यक्रम नभएपछि विद्यार्थी बस्नै मान्दैनन् ।’
अनुगमनका क्रममा ८ देखि १० कक्षासम्मका विद्यार्थीलाई विद्यालयको नाम समेत अंग्रेजीमा लेख्न आएन् । जोड्, घटाउ, गुणा, भागामा समेत कमजोर देखिए बालबालिका ।
यो विद्यालयमा शिक्षकको संख्या ठीकै छ । बालविकास केन्द्रमा दुई जना शिक्षिका छन् । प्रावितर्फ १ राहत र ७ स्थायी, निमाविमा १ राहत र ४ स्थायी, मावितर्फ ३ जना स्थायी र १ जना राहत शिक्षक कार्यरत छन् । एक जना लेखापाल र २ जना कार्यालय सहयोगी समेत कार्यरत छन् ।
यी शिक्षक र कर्मचारीकै तलवमा बार्षिक १ करोड १० लाख खर्च भइरहेको छ । तर नत्र विद्यार्थी आउँछन् र आएपनि शिक्षकले पढाउँदैनन् । अनुगमनमा जाँदा विद्यालयका प्रायः सबै शिक्षक रुखमुनी कुर्सीै लगाएर बसिरहेका थिए ।
प्रअ भन्छन्–कुनै शिक्षकले टेर्दैनन्
विद्यालयका प्रअ अशोक यादव विद्यालयमा काम गर्ने शिक्षकले नटेरिरहेको बताए । कक्षामा जान भन्दा नजाने गरेको उनले बताए । ‘कक्षामा जान भन्दा मान्दैनन्’ उनले भने, ‘दुई तीन घण्टा पढाएर जानै गर्छन् ।’
शिक्षकले आफूलाई गालीगलौज गर्दै अभद्र व्यबहार गर्ने गरेको प्रअ यादवले बताए । उनले यसबारेमा गाउँपालिका र जिल्ला प्रशासन कार्यालयमा समेत जानकारी गराइसकेको बताए ।
उनले विद्यालयमा सुधार गरेर शिक्षालाई गुणस्तरीय बनाउनेतर्फ काम थालनी गरेपनि निरन्तर असहयोगका कारण गर्न नसकेको बताए ।
