गंगा प्रसाद साह
भारदह । बुधबारको अबिरल बर्षाका कारण महुली खोलाको बाँध भत्किएर वस्ती डुबानमा परेपछि सप्तरीको हनुमाननगर कंकालिनी नगरपालिकाका स्थानीयले पूर्व पश्चिम राजमार्ग अवरुद्ध गरेका छन् ।
नगरपालिकाको वडा नम्बर ३ पोर्ताहामा बसोबास गर्दै आएका डोम समुदायको वस्ती नै डुबानमा परेपछि उनीहरुले पूर्व पश्चिम राजमार्ग अन्तर्गत महुली पुल छेउमा सडक अवरुद्ध गरेका हुन् । दिउँसो २ बजेदेखि सडक अवरुद्ध गरेपछि प्रहरीले बल प्रयोग गरेर खुलाएको छ ।
सडक खुलाउने क्रममा प्रहरीले लाठी प्रहार गर्नुका साथै एक राउण्ड हवाई फायर गरेको छ । सटगनबाट एक राउण्ड हवाई फायर गरिएको इलाका प्रहरी कार्यालय कंचनपुरका प्रमुख डीएसपी दीपक रायल जानकारी दिए ।
प्रहरीले बल प्रयोग गरी दिउँसो ३ बजेदेखि सडक जाम खुलाएको छ ।
प्रहरीले बल प्रयोग गर्न खोज्दा प्रदर्शनकारीले पनि ढुँगा प्रहार गरेका थिए । तर, प्रहरीले लाठी चार्ज गर्दै जाम खुलाएका छन् ।
पोर्ताहा खण्डमा महुली खोलाको बाढीले प्रत्येक बर्ष वस्ती डुबाउने गर्दछ । खोला छेउमा एक दर्जन डोम परिवार घर बनाएर बस्दै आएका छन् । प्रत्येक बर्ष बाढीले आफूहरुलाई डुबाउने र राज्यले कुनै किसिमको ध्यान नदिएकाले आन्दोलनमा उत्रेका स्थानीय गुल्मी मरिकले बताए ।
महुली खोलाको बाँध भत्किएर आएको बाढीले नजिकैको झण्डै ५० बिघा जग्गा डुबानमा परेको छ ।
