परिष कर्ण
राजविराज ।
मधेश प्रदेशका कार्यबाहक मुख्यमन्त्री कृष्ण यादवले सिंचाईको समस्या समाधान गर्ने हैसियत नरहेको बताएका छन् ।
सप्तरीको तिलाठी कोइलाडी गाउँपालिकाको आईतबार गाउँसभा उद्घाटन गर्दै प्रदेशको भौतिक पूर्वाधार मन्त्री समेत रहेका यादवले उक्त कुरा बताएका हुन् । प्रदेशमा सिंचाईको समस्या व्याप्त रहेको बताउँदै उनले यो समस्या समाधान गर्ने हैसियत प्रदेश सरकारको नरहेको बताए ।
‘यो समस्याको समाधान संघीय सरकारले गर्न सक्छ’ उनले भने, ‘या संघ मार्फत् कुनै दातृ निकायले गर्न सक्छ ।’
बागमती नदीमा डाइभर्सन बनाएर पाँच जिल्लामा बाह्रै महिना सिंचाई गर्न सकिने र १०५ मेगावाट विद्युत समेत उत्पादन गर्न सकिने उनले बताए । ‘यसका लागि संघीय सरकारको ध्यानाकर्षण गराइएको छ’ उनले भने ।
प्रदेश सरकारले सबैभन्दा बढी जोड् कृषिमा दिएको भन्दै उनले श्रोतसाधनबिहीन प्रदेशमा हात, विवेक र मिहिनेत प्रयोग गरिनुपर्ने बताए । ‘अन्यथा भविष्य निर्माणको अन्य विकल्प छैन’ उनले भने ।
कार्यक्रममा प्रदेश सभा सदस्य सतिश कुमार सिंह, नेपाली काँग्रेसका जिल्ला सभापति रामदेव साह, मैथिली साहित्य परिषदका अध्यक्ष अवधेश कुमार झा, देवनारायण यादवसहितकाले मन्तब्य ब्यक्त गरेका थिए ।
गाउँपालिका अध्यक्ष अरुण कुमार मण्डलको अध्यक्षतामा भएको कार्यक्रममा स्वागत उपाध्यक्ष फुलकुमारी साहले गरेकी थिइन् । कार्यक्रमको सञ्चालन अधिकृत राजेश कुमार झाले गरेका थिए ।
