विनय कर्ण
राजविराज, १ साउन । डाक्नेश्वरी नगरपालिकाका उप–प्रमुख मिरा कुमारी यादव र उनका पति महेन्द्र यादवले भारतको मतदाता नामावलीबाट नाम हटाएको तथ्य फेला परेको छ ।
नेपाल र भारत दुई देशको नागरिकता लिएको आरोपमा मुद्दा खेपिरहेका दुवै जनाले भारतको विहार राज्य अन्तर्गत विधानसभा निर्वाचन क्षेत्र नम्बर ४१ निर्मली सुपौल बुथ संख्या ५१ बाट २०७९ भदौ २६ मा निवेदन दिएर नाम हटाएको हो ।
विधानसभा निर्वाचन क्षेत्र ४१ निर्मली सुपौल वुथ संख्या ५१ बाट २०८० असार १२ गते (सन् २७ जुन २०२३) मा जारि भएको कागजमा २०७९ भदौ २६ (सन् ११ सेप्टेम्बर २०२२) देखि मिरा र उनका पति महेन्द्र यादवको नाउँ हटाईएको उल्लेख गरिएको छ । यद्यपी त्यो कागजको आधिकारिताबारे पुष्टि हुन भने बाँकी छ ।
श्रोत मार्फत उपलब्ध भएको “निर्वाचन सुची से नाम विलोपित प्रमाण–पत्र” लेखिएको र विधानसभा निर्वाचन क्षेत्र नम्बर ४१ निर्मली सुपौल, बुथ संख्या ५१ लेखिएको स्टाम्प लागेको त्यो कागजमा त्यहाँको मतदाता नामाबलीमा रहेको क्रम संख्या ६३२ मिराकुमारी यादव र क्रम संख्या ६३३ पति महेन्द्र कुमार यादव, पति पत्नीको आवेदन अनुसार २०७९ भदौ २६ गते बाट हटाईएको उल्लेख छ ।
यसअघि अनुमंडलीय न्यायालय निर्मली सुपौलको सपथपत्रमा २०७९ साउन १७ (२ अगस्त २०२२) मा नम्बर १८७३ मिरा र १८७४ मा उनका पति महेन्द्रले हस्ताक्षर गरेको कागज सार्वजनिक भएपछि मिरा र उनका पति महेन्द्र बिरुद्ध २०७९ साउनमा जिल्ला प्रशासन कार्यालय सप्तरीमा पहिलो पटका उजुरी परेको थियो ।
जिल्ला प्रशासनबाट ठोस पहल नहुँदा नागरिकता सम्बन्धी कसुर मुद्दामा जेठ ५ गते अदालतबाट परमादेश जारि भएपछि असार १७ गते जिल्ला प्रहरी कार्यालयले मिरा र महेन्द्र बिरुद्धमा मुद्दा दर्ता गरेपछि असार २० गते मिरा आफै जिल्ला प्रहरी कार्यालय सप्तरीमा हाजिर भएकी थिइन् भने उनका पति महेन्द्र हाल सम्म फरार रहेका छन् । मिरा सप्तरी जिल्ला अदालतबाट तेश्रो पटक म्याद थप भएर अनुसन्धानको क्रममा जिल्ला प्रहरी कार्यालयमा छिन् ।
डाक्नेश्वरी नगरपालिका वडा नं. ३ निवासी कृष्णकुमार यादवले उप–प्रमुख मिरा र उनका पति महेन्द्र भारतको बिहारस्थित मझारी पञ्चायत अन्तर्गतको मझारी गाउँका स्थानीय भएको दाबी गर्दै असार १७ गते भारतीय नागरिक मिरा नेपालको नागरिकता समेत लिई उपमेयर बनेको र प्रहरी, प्रशासनले मुद्दा दर्ता गर्न नमानेको भन्दै उच्च अदालतमा परमादेशको माग गर्दै रिट दायर गरेका थिए ।
