काठमाडौं । मधेश प्रदेशका मुख्यमन्त्री र अर्थमन्त्रीलाई हटाउन जसपा नेपालका अध्यक्ष उपेन्द्र यादवलाई दवाव परेको छ ।
पार्टी फुटपछि बुधबार काठमाडौंमा उपलब्ध केन्द्रीय सदस्यहरुको बसेको बैठकमा मधेशका मुख्यमन्त्री सरोज कुमार यादव र अर्थ मन्त्री संजय कुमार यादवलाई हटाउन अध्यक्ष यादवलाई दवाव दिइएको हो ।
पार्टीका नेताहरुले यी दुई जनाका कारण मधेश प्रदेश सरकार जनअपेक्षा अनुसार काम नगरेको, आफ्नै पार्टीका नेता÷कार्यकर्तालाई वेवास्ता गरेको भन्दै दुबैलाई हटाउन अध्यक्ष यादवलाई दवाव दिएका छन् । ‘यी दुबैका कारण संगठन पनि कमजोर हुन थालेको अवस्थाबारे अधिकांसले बैठकमा कुरा राखे’ बैठकमा सहभागी एक नेताले भने, ‘यी दुईबाहेक प्रदेश अध्यक्ष बालकिशोर यादवको काम कार्वाहीपनि सुस्त भएकोबारे अध्यक्षलाई अवगत गराएका छन् ।’
यसबारे अध्यक्ष यादव पनि सकारात्मक देखिएको ती नेताले बताए ।
हालै पार्टी विभाजन भएपछि उपलब्ध केन्द्रीय समितिका पदाधिकारीको बैठक बसाएर छलफल गरिएको छ । पार्टीको औपचारिक केन्द्रीय समितिको बैठक बैशाख ३१ र जेठ १ गते गरी दुई दिन बस्ने जनाइएको छ ।
