महेन्द्र सदा
पातो । बिभिन्न माग राख्दै आन्दोलन गर्दै आएका सप्तरीको डाक्नेश्वरी नगरपालिकाका प्रमुख चार दलका नेताद्धारा सोमबार पातो बजार बन्द गरिएको छ ।
आफूहरुले राखेको १४ बुँदे मागप्रति नगर प्रमुखसहितका जनप्रतिनिधीले कुनै चासो नदिएको भन्दै उनीहरुले सोमबार बिहानदेखि पातो बजार बन्द गराएका हुन् । डाक्नेश्वरीको प्रमुख बजार पातो नै हो ।
नेपाली कांग्रेस, जनता समाजवादी पार्टी (जसपा), नेकपा माओवादी केन्द्र र लोकतान्त्रिक समाजवादी पार्टी (लोसपा) का नेताहरु आफ्ना माग राख्दै एक सातादेखि नगरपालिकाको कार्यालय अगाडि धर्ना दिदैं आएका थिए ।
नेपाली कांग्रेसका नगर सभापति नारायण यादवले १ जेठमै १४ बुँदे माग राखेर ज्ञापन बुझाएपनि नगर प्रमुख रामलखन मलाहले वेवास्ता गरेको बताए ।
राजनीतिक दलका नेताहरुले राजनीतिक प्रतिशोधको नाममा गरिएको शिक्षक सरुवा अविलम्ब खारेज गर्नुपर्ने, दरबन्दी मिलान बेगर शिक्षकको सरुवा गर्ने निर्णयमा सहभागी शिक्षा अधिकृत कृष्ण कुमार यादवलाई सरु्वा गर्न, नगर शिक्षा ऐन संशोधन गर्न, राजनीतिक पुर्वाग्रही तरिकाले हटाइएका कर्मचारीलाई पुनर्वहाली गर्न, सामाजिक सुरक्षा भत्ता त्रैमासिक रुपमा उपलब्ध गराउन, कोरोनाको समयमा गरिएको खर्चको आयव्यय सार्वजनिक गर्न, सर्पदंस अस्पतालको लागि खरिद गरिएको उपकरणमा भएको अनियमितता छानबिन गरी अविलम्ब संचालन गर्न, सर्वदलीय बैठकद्वारा टोल बस्ती समिति अविलम्ब गठन गरि संचालन गर्नसहितका माग राखेका छन् ।
तर, माग पूरा गर्न चासो नदिएको भन्दै उनीहरु आन्दोलन गर्दै आएका छन् ।
