राजविराज । सप्तरीका पालिकाहरुले अत्यधिक जाडो हुने दिन आ–आफ्नो क्षेत्रमा दाउरा बितरण गरी आगो बाल्ने व्यवस्था मिलाउने भएको छ ।
जिल्ला विपद् व्यवस्थापन समितिको मंगलबार बसेको बैठकले यस्तो निर्णय गरेको छ । पालिकाले आगो बाल्ने व्यवस्था मिलाउने र दाउरा व्यवस्थापनको लागि डिभिजन वन कार्यालयसँग समन्वय गर्नेछ ।
अत्यधिक जाडोबाट अति विपन्न, बृद्धबृद्धा, बालबालिका, अशक्त एवं अपाङता भएका लगायतका जनसंख्या बढी प्रभावित हुन सक्ने भएकाले सबै पालिकाले जाडो छल्न आवश्यक पर्ने कम्बल, सिरक, लत्ताकपडा र दाउराको व्यवस्थापन गर्ने साथै आवश्यक पर्ने थप सामग्रीको लागि जिल्ला प्रशासन कार्यालय राष्ट्रिय विपद जोखिम न्यूनिकरण तथा व्यवस्थापन प्राधिकरण र गृह मन्त्रालयसँग माग गर्ने निर्णय भएको छ ।
बैठकले स्थानीय तहको विपद् व्यवस्थापन कोष, जिल्ला विपद व्यवस्थापन कोष र नेपाल रेडक्रस सोसाइटी, गैसस महासंघ, उद्योग बाणिज्य संघ मार्फत अति विपन्न, असहाय, वृद्ध, अपाङता र अरुको सहारा लिनुपर्ने व्यक्ति÷परिवारलाई स्थानीय तहको छनौट तथा सिफारिस अनुसार गरी कम्बल तथा न्यानो कपडा बितरणको व्यवस्था मिलाउने निर्णय समेत गरेको छ ।
विपद् व्यवस्थापनसँग सम्बन्धित राहत बितरण गर्दा जिल्लामा कार्यरत संघ–संस्थाहरुले जिल्ला विपद् व्यवस्थापन समिति÷जिल्ला प्रशासन कार्यालयसँग समन्वय गरी स्थानीय तहको सहभागितामा एकद्धार प्रणालीबाट राहत वितरणको व्यवस्थापन गर्ने। स्थानीय तहहरुले विपद्सँग सम्बन्धित स्वास्थ्य प्रयोजनका लागि द्रूत प्रतिकार्य समिति र द्रूत प्रतिकार्य टोली गठन गरी जिल्ला विपद् व्यवस्थापन समितिलई उपलब्ध गराउने निर्णय बैठकले गरेको छ ।
यस्तै, बैठकले जिल्लाका स्थानीय तह, गैसस, रेडक्रस लगायत विपद्सँग सम्बन्धित सरोकारबाला निकायहरुबीच जिम्मेबार व्यक्ति÷फोकल पर्सन तोकी सूचना प्रवाह र निरोधका उपाय शिघ्र अबलम्बन गर्न ह्वाट्एप ग्रूप निर्माण गरी सकृय सहभागिता जनाउने, शितलहरको प्रभावबाट जोगिन झोलिलो पदार्थ, तातोपानी, पोषिलो खाना, न्यानो कपडा र घरभित्र बस्ने लगायतका संदेशमूलक सूचना आम संचारका माध्यमबाट सबै पालिकाले प्रचार÷प्रसार गराउने व्यवस्था मिलाउने निर्णय पनि गरेको छ ।
