दीपेन्द्र झाको पार्टी प्रवेश ः पहिलो गाँसमै ढुँगा

मधेश सम्वाददाता
राजविराज, १८ भदौ ।
मधेश प्रदेशको मुख्य न्यायाधिबक्ताको पदबाट राजीनामा दिएर दीपेन्द्र झा जनता समाजवादी पार्टी (जसपा) मा प्रवेश गरेका छन् । उनलाई पार्टी अध्यक्ष उपेन्द्र यादवले फूलमाला र गमछा लगाइदिएर स्वागत गरे ।
पार्टीमा प्रवेश गरेका झालाई भने पहिलो गाँसमै ढुँगा देखियो । उनी बोल्न शुरु गर्दा मंच तलबाट जसपा कार्यकर्ताकै हुटिंग भयो । कतिपयले हल्ला नै गर्न थाले । उनीहरुले पार्टीमा झा आएकोमा बिरोध नै गरे ।
यद्यपी बोल्नबाट झा रुकेनन् । उनी आधा भन्दा बढी समय जसपा कार्यकर्ताले गरेको बिरोधमै बोल्न खर्चिए । ‘मलाई बोल्न दिनुहुन्न, अंकुश लगाउनुभयो भने ठीक हुँदैन्’ झाले भने, ‘घर प्रवेश गर्ने मान्छेलाई दरबाजामा रोकिदैन्, दुव्र्यबहार गरिदैन ।’
आफू समाजसेवा र वकालत छोडेर जसपा प्रवेश गरेको भन्दै झाले सार्वजनिक कार्यक्रममा बोल्न अंकुश लगाइदिनु लोकतन्त्रका लागि राम्रो नभएको बताए । ‘सबै जना बोल्दै हुनुहुन्छ । मलाई पनि बोल्ने मौका दिनुहोस् । म बोल्दा बीच बीचमा म्यूनिजक बजाएर डिस्टर्ब नगर्नुस्’ उनले भने ।
सारा क्यारियर, सारा परिवार छोडेर आफू पार्टीमा आएको भन्दै उनले त्यहीं भएर कुनै पनि संघर्ष गर्न तयार रहेको पनि बताए ।
एनले अगाडि भने, ‘म पार्टीमा आएर के अन्याय गरे ? म राजनीति गर्न खोजेको हुँ मेरो के गल्ती भयो ?’
आफू कुनै पद लिनका लागि नआएको र यस क्षेत्रको विकास गर्न भिजनसहित आएको झाले बताए । ‘यस क्षेत्रको सडक बन्नुप¥यो । शिक्षा, स्वास्थ्यको सुनिश्चितता हुनुपर्यो’ उनले भने ।
आफू राजनीतिमा बच्चा भएको र राजनीति सिकाइदिन उनले अग्रजसँग आग्रह गरे ।
‘यदी मबाट कुनै गल्ती भएको भए, म प्रवेश गर्दा कसैलाई तकलिफ भएको भए क्षमा चाहन्छु’ उनले भने ।
आफ्नो लागि पार्टी अध्यक्षजीको निर्देशन बाणजस्तो हुने भन्दै झाले अध्यक्षज्यूले जसरी भन्नुहुन्छ त्यसरी नै गर्ने बताए । ‘राजनीतिमा आफ्नो भविष्य हेर्छु । नसके आफ्नो हातको वकालत छँदैछ त्यहीं गर्छु’ उनले भने ।
मुख्य न्यायाधिबक्ता पदबाट राजीनामा दिएर जसपा प्रवेश गरेका झा महोत्तरी क्षेत्र न्म्बर ३ बाट प्रतिनिधीसभाको चुनाव लड्ने लक्ष्य राखेका छन् । झाले आफू त्यसकै निम्ति राजीनामा दिएको बताए ।
यो क्षेत्रबाट २०७४ को निर्वाचनमा लोसपा अध्यक्ष महन्थ ठाकुर निर्वाचित भएका थिए । जसपाबाट टिकट लिएर लडने लक्ष्य राखेका छन् । यद्यपी टिकटकै बिषयलाई लिएर पार्टी नेता हरिनारायण यादव पक्षका कार्यकर्ताले बिरोध गरेका छन् । यादव पक्ष नवप्रवेशीलाई टिकट दिन नहुने बताएका छन् । एक कार्यकर्ताका अनुसार उनलाई पार्टीमा ल्याएर टिकट दिने र पुरानोलाई पाखा लगाउने काम गरेपछि सामान्य हो हल्ला भएको थियो ।