मधेश सम्वाददाता
राजविराज, २५ असोज ।
सप्तरीमा १८ जना महिला मात्रै प्रत्यक्षतर्फ उम्मेदबार बनेका छन् । कुल १८१ जनाको उम्मेदबार बनेकोमा १८ जना महिलाको मात्रै मनोनयन पत्र दर्ता भएको छ ।
प्रतिनिधीसभामा ५ जना महिलाले उम्मेदबारी दिँदा प्रदेश सभामा १३ जना महिलाको उम्मेदबारी परेको छ ।
प्रतिनिधीसभामा क्षेत्र नम्बर १ बाट टिकालक्ष्मी चौधरीले उम्मेदबारी दिएकी छन् । उनी नागरिक उन्मुक्ति पार्टीबाट मनोनयन पत्र दर्ता गराएकी छन् ।
प्रतिनिधी सभा सदस्य पदका लागि क्षेत्र नम्बर २ बाट तीन जना महिलाको उम्मेदबारी परेको छ । नेपाल संघीय समाजवादी पार्टीबाट प्रमिला देवी मण्डल, पिछडावर्ग निषद दलित जनजाती पार्टीबाट सुमित्रा मण्डल र नेपाली जनता दलबाट चन्द्र कुमारी देवले उम्मेदबारी दिएका छन् ।
क्षेत्र नम्बर ४ बाट माधुरी कुमारी साहको प्रतिनिधी सभा सदस्य पदका लागि स्वतन्त्र उम्मेदबारी परेको छ ।
प्रदेश सभातर्फ १ को ‘क’ बाट शशीकला कुमारी चौधरी र १ को ‘ख’ सुनिता कुमारी मलाहले उम्मेदबारी दिएकी छन् । चौधरीले नेपाल कम्युनिष्ट पार्टीबाट र मलाहले नेपाल मजदूर किसान पार्टी (नेमकिपा) बाट उम्मेदबारी दिएकी छन् ।
क्षेत्र नम्बर २ को ‘क’ बाट तीन जना महिलाको उम्मेदबारी परेको छ । चन्द्रकला सिंह र पुनिता कुमारी ठाकुरले स्वतन्त्र उम्मेदबारी दिँदा बिणा देवी यादवले नेपाल मजदूर किसान पार्टी (नेमकिपा) बाट उम्मेदबारी दिएकी छन् ।
क्षेत्र नम्बर २ को ‘ख’ बाट पनि तीन जना महिलाको उम्मेदबारी परेको छ । प्रतिमा कुमारी देवले नेपाली कांग्रेस (विपी) बाट उम्मेदबारी दिँदा सकुन्तला देवी यादव र रिंकु देवी यादवले स्वतन्त्रबाट उम्मेदबारी दिएकी छन् ।
क्षेत्र नम्बर ३ को ‘क’ बाट गिरिजा कुमारी चौधरीले नेपाल कम्युनिष्ट पार्टीबाट उम्मेदबारी दर्ता गराएकी छन् । क्षेत्र नम्बर ३ को ‘ख’ बाट ऐलिना आचार्यले राप्रपाबाट र डोमनी देवी रामले राप्रपा नेपालबाट उम्मेदबारी दिएकी छन् ।
क्षेत्र नम्बर ४ को ‘क’ बाट चिन्तादेवी सिंहले स्वतन्त्र उम्मेदबारी दिँदा क्षेत्र नम्बर ४ को ‘ख’ बाट ललिता देवी लताले स्वतन्त्र रुपमै उम्मेदबारी दिएकी छन् ।
