मधेश सम्वाददाता
राजविराज, २४ असोज ।
सप्तरीमा स्वतन्त्र उम्मेदबारी दिनेको लर्काे लागेको छ । आगामी मंसीर ४ गते हुने प्रतिनिधी र प्रदेश सभाको निर्वाचनका लागि जिल्लामा ६६ जनाले स्वतन्त्र उम्मेदबारी दिएका छन् ।
जिल्लामा कुल उम्मेदबारी दिनेको संख्या १ सय ८१ छ । यसमध्ये प्रतिनिधी सभा सदस्य पदकै लागि ७० जनाले उम्मेदबारी दिएका छन् । उम्मेदबारी दिएकामध्ये ४ जना मात्रै निर्वाचित हुनेछन् ।
१११ जनाले प्रदेश सभामा उम्मेदबारी दिएका छन् । यसमध्ये ८ जना मात्रै निर्वाचित हुनेछन् ।
उम्मेदबारी दिएकामध्ये ६६ जनाले स्वतन्त्र उम्मेदबारी दिएका छन् । प्रतिनिधी सभामा २७ जना र प्रदेश सभामा ३९ जनाले स्वतन्त्र उम्मेदबारी दिएका छन् ।
प्रतिनिधी सभा सदस्य पदका लागि क्षेत्र नम्बर १ मा सबैभन्दा बढी १० जनाले स्वतन्त्र उम्मेदबारी दिएका छन् । क्षेत्र नम्बर ४ मा ७ जना, क्षेत्र नम्बर ३ मा ६ जना र क्षेत्र नम्बर २ मा ४ जनाले उम्मेदबारी दिएका छन् ।
प्रदेश सभामा स्वतन्त्र उम्मेदबारी दिएका ३९ जनामध्ये प्रदेश १ को ‘क’ मा ३ जना र १ को ‘ख’ मा ३ जना छन् ।
प्रदेश सभा निर्वाचन क्षेत्र २ को ‘क’ मा ५ जना, २ को ‘ख’ मा ५ जना, क्षेत्र नम्बर ३ को ‘क’ मा ११ जना र ३ को ‘ख’ मा ३ जनाले स्वतन्त्र उम्मेदबारी दिएका छन् ।
यस्तै, निर्वाचन क्षेत्र ४ को ‘क’ मा ५ जना र ४ को ‘ख’ मा ४ जनाले स्वतन्त्र उम्मेदबारी दिएका छन् ।
उम्मेदबारकै डमी उम्मेदबार
स्वतन्त्र उम्मेदबारी दिने अधिकांस चुनाव लड्नका निम्ति उम्मेदबार बनेको होइनन् । राजनीतिक दलबाट उम्मेदबार बनेकाहरुले आफ्ना सहयोगका निम्ति डमी उम्मेदबारी दर्ता गराएका छन् ।
उम्मेदबारलाई गाडीको प्रयोग गर्न र प्रतिनिधी खटाउन निर्वाचन आयोगले लिमिट तोकेको छ । त्यो लिमिटभन्दा उम्मेदबारले बढी गाडीको प्रयोग गर्न पाउँदैनन् । त्यहीं भएर उम्मेदबारले नै आफू निकटका व्यक्तिलाई स्वतन्त्र उम्मेदबारी दिलाएर आफ्नो स्वार्थ पूरा गर्न खोजेका छन् ।
