२८ कात्तिक, राजविराज । लोकतान्त्रिक–बाम गठबन्धनका नेताहरुले जनताको अधिकार प्राप्तिका लागि यहीं गठबन्धनका नेताहरुलाई जिताउनुपर्नेमा जोड् दिएका छन् ।
गठबन्धनको सप्तरी क्षेत्र नम्बर २ द्वारा सोमबार छिन्नमस्ता गाउँपालिकामा आयोजित चुनावी सभालाई सम्बोधन गर्दै नेताहरुले यो गठबन्धन विजयी नभएमा देशमा अधिनायकवादी हावी हुने बताए । जनतालाई अधिकार दिलाउन नचाहने व्यक्ति र गठबन्धनलाई जिताए जनता अधिकारबाट बंचित रहीरहने बताए ।
जसले जनतालाई मार्न लगाएर सत्ता प्राप्ति गरे, जनताका अधिकार बिर्से त्यस्ता व्यक्तिलाई मत दिनु भनेको आफ्नो खुट्टामा आफैं बञ्चरो प्रहार गर्नु रहेको नेताहरुले बताए ।
कार्यक्रममा नेपाली कांग्रेसका जिल्ला उप सभापति रामकुमार यादवले यस क्षेत्रमा गठबन्धनबाट उम्मेदबारी दिएकाहरुलाई जिताउनुपर्ने बताए । उनले जनताको रगतसँग खेलबाड गर्नेहरुलाई कुनै पनि हालतमा मत नदिन मतदातासँग आग्रह गरे ।
एकीकृत नेकपा समाजवादी पार्टीका अध्यक्ष प्रतापनारायण चौधरीले देशलाई ठूलो दुर्घटनाबाट यहीं गठबन्धनले जोगाएको बताए । देशको विकास, जनतालाई अधिकार दिलाउने सवालमा यहीं गठबन्धन इमान्दार भएर अघि बढ्ने उनले बताए ।
राजविराज नगरपालिकाका पूर्व मेयर एवं लोकतान्त्रिक समाजवादी पार्टीका नेता शम्भु यादवले जनताको रगत साटेर कुर्सीमा जानेहरुलाई जनताले चिन्नुपर्ने धारणा राखे । उनले जनतासँग बेइमानी गर्नेहरुलाई समयमै चिन्न र मतको सही सदुपयोग गर्न आग्रह गरे ।
कार्यक्रममा नेपाली कांग्रेस, नेकपा माओवादी केन्द्र, लोकतान्त्रिक समाजवादी पार्टी (लोसपा), नेकपा एकीकृत समाजवादीका नेताहरुले मन्तव्य व्यक्त गर्दै यो गठबन्धनका प्रतिनिधी सभा सदस्य पदका उम्मेदबार जयप्रकाश ठाकुर, प्रदेश सभा सदस्य पदका उम्मेदबार उमेश यादव र सरोज मण्डललाई जिताउन जनतासँग आग्रह गरेका थिए ।
