राजविराज । सप्तरी कारागारका सात जना कैदीको कैद मिनाहा भएको छ । गणतन्त्र दिवसको अवसर पारेर राष्ट्रपति रामचन्द्र पौडेलद्धारा उनीहरुको कैद मिनाहा गरिएको हो ।
कैद मिनाहा हुनेमा २ जना बहुविवाह मुद्दाका, दुई जना सबारी ज्यान मुद्दाका, एक जना ज्यान मार्ने उद्योग, एक जना डाँका र एक जना कुटपिट तथा अंगभंग मुद्दामा कैद भुक्तान गर्नेहरु छन् ।
बहुविवाह मुद्दामा कैद भुक्तान गरिरहेका सप्तरीको डाक्नेश्वरी नगरपालिका ६ का मो. समीम र रुपनी गाउँपालिका ४ का रोशन यादव, सबारी ज्यान मुद्दामा कैद भुक्तान गरिरहेका खडक नगरपालिका ४ का मो. रुस्तम र शम्भुनाथ नगरपालिका ८ का संजय कुमार ठाकुर यहाँबाट रिहा भएका छन् ।
यस्तै, डाँका मुद्दामा कैद भुक्तान गरिरहेका खडक नगरपालिका ९ का एयुब मियाँ, ज्यान मार्ने उद्योग मुद्दामा कैद भुक्तान गरिरहेका सिरहाको कर्जन्हा नगरपालिकाका आफ्ले भन्ने पूर्णबहादुर राई र कुटपिट तथा अंगभंग मुद्दामा कैद भुक्तान गरिरहेकी महादेवा गाउँपालिका १ की सरातुन खातुनको कैद मिनाहा गरिएको कारागारका प्रशासक राजकुमार बरालले जानकारी दिए ।
सरकारको सिफारिसमा राष्ट्रपति रामचन्द्र पौडेलले जन्मकैदको सजाय तोकिएका रेशम चौधरीसहित १९ जनालाई आम माफी दिइएको छ । चौधरी सोमबार बिहान रहा भइसकेका छन् ।
