राजविराज । सप्तरीमा आत्महत्या गर्ने क्रम बढेको छ । सानोतिनो कुरामा पनि बिष खाएर अथवा झुण्डिएर मर्नेको संख्यामा वृद्धि हुन थालेको छ । आत्महत्याको प्रयास गर्ने व्यक्ति समयमा अस्पताल पुगे ज्यान बाँच्छ भने ढिलो गरेमा ज्यान गुमाउने गरेका छन् ।
पछिल्लो पटक देखिएको आत्महत्या गर्ने प्रबृत्तिले समाजलाई झस्काएको छ । सामुन्नेमा रहेका पति–पत्नीबीच विवाद भएर मात्र होइन् फोनमा कुरा गर्ने क्रममा विवाद हुँदा पनि आत्महत्याको प्रयास गर्ने गरेको देखिन्छ ।
जिल्लाको सप्तकोशी नगरपालिकाकी एक महिला यस्तै घट्नाको उदाहरण बनेकी छन् । विदेशमा रहेका आफ्ना पतिसँग फोनमा विवाद हुँदा बिष खाएकी छन् ।
नगरपालिकाको वडा नम्बर ४ बलार्दह निवासी ३० बर्षीया पुनिता मरिकले विदेशमा रहेका पति नागेन्द्रसँग फोन गर्ने क्रममा विवाद हुँदा बिष खाएको प्रहरीले जनाएको छ । उनको कंचनरुप नगरपालिकामा उपचार भइरहेको र अवस्था सामान्य रहेको जिल्ला प्रहरी कार्यालय, राजविराजले जनाएको छ ।
यस्तै, तिरहुत गाउँपालिका ५ लोहजारा बस्ने लक्ष्मण यादवकी २० बर्षीया पत्नी अनिता यादवले पनि बिष खाएकी छन् । तरकारीमा छर्ने नाम नखुलेको बिषादी खाएकी उनको गजेन्द्रनारायण सिंह अस्पतालमा उपचार भइरहेको प्रहरीले जनाएको छ ।
जिल्लाको डाक्नेश्वरी नगरपालिकामा एक बालिकाले बिष खाएकी छन् । नगरपालिकाको वडा नम्बर १ घर भई सोही नगरपालिकाको वडा नम्बर ६ औरहीमा बस्ने मनोज साहकी १७ बर्षीया छोरी स्मृतिले मुसा मार्ने बिषदी खाएको प्रहरीले जनाएको छ । उनको पनि गजेन्द्रनारायण सिंह अस्पतालमा उपचार भइरहेको प्रहरीले जनाएको छ ।
अनिता र स्मृतिले बिष खाएको सम्बन्धमा खुल्न नसकेको र अनुसन्धान भइरहेको प्रहरीले जनाएको छ ।
