राजविराज । नेपाल शिक्षक महासंघ, सप्तरीले बिष्णुपुर गाउँपालिकाले शिक्षकसँग सोधेको स्पष्टिकरण फिर्ता लिन माग गर्दै संघर्षको कार्यक्रम अगाडि बढाएको छ ।
गाउँपालिकाले एक बर्षदेखि प्रत्येक विद्यालयमा दशौं पटक अनुगमन निरीक्षण गर्दै आएकोमा हालसम्म विज्ञ टोली नराखिएको र २०८० बैशाख, जेठ महिनामा गर्दै आएको अनुगमन निरीक्षण व्यक्तिगत, राजनीतिक स्वार्थ तथा पूर्वाग्राही देखिन आएकोले शिक्षकसँग सोधिएको स्पष्टिकरण अबिलम्ब फिर्ता लिन माग गरेको छ ।
महासंघले बुधबार प्रेस बिज्ञप्ती जारी गर्दै उक्त माग गरेको छ । बिज्ञप्तीमा गाउँपालिकाद्धारा निर्माण गरिएको शिक्षा ऐन, नियमावली तथा कार्यविधीलाई प्रअ, शिक्षकसँग छलफल गरी पुर्नलेखन गर्नुपर्ने माग पनि गरेको छ ।
यस्तै, महासंघसँग भएको सम्झौता बमोजिम शिक्षा अधिकृतको तुरन्त व्यवस्था गर्नुपर्ने, आ.ब. २०७८÷७९ को बालविकास सहयोगी कार्यकर्ता, कर्मचारी र कार्यालय सहायकहरुको ५ महिनाको पालिकाबाट पाउनुपर्ने तलव, भत्ता भुक्तानी गर्नुपर्ने, मदर्सा फैजुलको बैंक खाता अबिलम्ब फुकुवा गर्नुपर्ने र दरबन्दी मिलान कार्यलाई वस्तुनिष्ठ, परिपत्र तथा नियमानुसार गर्न माग गरेको छ ।
महासंघका अध्यक्ष दिनेश प्रसाद यादव र सचिव लखिन्द्र प्रसाद साहले जारी गरेको बिज्ञप्तीमा माग अघि बढाउँदै संघर्षको कार्यक्रम तय गरिएको छ ।
जस अनुसार जेठ १९ गते कालोपट्टी बाँधेर कामकाज गर्ने, २१ गते गाउँपालिकामा १ घण्टा धर्ना दिने, २२ गते ४ घण्टा धर्ना दिने, २३ गते बिहान १० देखि ५ बजेसम्म धर्ना दिइने जनाउँदै बिज्ञप्तीमा भनिएको छ, ‘२३ गते नै दोस्रो चरणको कार्यक्रम निर्धारण गरिनेछ ।’
