राजविराज । विष्णुपुर गाउँपालिकामा राजनीतिकमा लागेका शिक्षकलाई धमाधम स्पष्टिकरण सोध्न शुरु गरिएको छ । शिक्षक राजनीतिमा लागेपछि विद्यार्थीको पठनपाठन कमजोर भइरहेको भन्दै गाउँपालिका अध्यक्ष उमेश प्रसाद यादवले विद्यार्थीको पठनपाठनमा समय दिनुपर्ने शिक्षक राजनीतिकमा लागिरहे त्यो स्वीकार्य नहुने बताए ।
गाउँपालिकाको वडा नम्बर १ स्थित जनता मावि खुरहुरियामा शुक्रबार आयोजना गरिएको अभिभावक भेलालाई सम्बोधन गर्दै अध्यक्ष यादवले पढाउन छाडेर राजनीतिमा लागेका शिक्षक कुनै पनि हालतमा स्वीकार गर्न नसकिने बताए । ‘बरु गाउँपालिकाबाट अनुदान दिएर नयाँ र अनुभवी शिक्षक ल्याउँछौं’ उनले भने, ‘तर, पढाउन छाडेर राजनीति गर्ने शिक्षक कुनै हालतमा स्वीकार्य हुँदैन् ।’
विद्यालय सुधारका क्रममा हाल गाउँपालिका मातहतका विद्यालयहरुमा अनुगमन तिब्र बनाइएको उल्लेख गर्दै अध्यक्ष यादवले अनुगमनका क्रममा पुग्ने टोलीलाई असहयोग गर्ने र विभिन्न बहाना देखाई भाग्ने शिक्षक आफ्नै पार्टी निकटको भएपनि नछाडिने चेतावनी दिए । ‘स्थानीय सरकारलाई प्राप्त अधिकार कडाईका साथ प्रयोग ग¥छौं’ उनले भने ।
केही दिनअघि यस विद्यालयमा शिक्षा शाखाका पदाधिकारीसहितको टोली लिएर अनुगमनमा आउँदा पठनपाठनको अवस्था सन्तोषजनक नरहेको अधिकांश विद्यार्थी तथा अभिभावकले गुनासो गरेको सुनाउँदै उनले भने, ‘गुनासो आउने क्रम अझै जारी रहेपछि सम्बन्धित दुई जना शिक्षकलाई स्पष्टिकरण सोधिएको छ ।’
स्पष्टिकरणमा परेका शिक्षकहरु आफ्नो गल्ति त्रृटी सुधार्नुको सटा शिक्षक संघ र युनियनमा सहयोगका लागि गुहार्न पुगेको र अनावश्यक बखेडा झिकेर विद्यार्थीको जिवनसँग थप खेलवाड गर्न खोजेको उनको आरोप थियो ।
गाउँपालिकाले स्पष्टिकरण सोधेपछि शिक्षक महासंघले बिज्ञप्ती जारी गर्दै उक्त स्पष्टिकरण अबिलम्ब फिर्ता लिन माग गरेको थियो ।
उनले जिल्लाको पुरानो मध्येका एक यस विद्यालयलाई नमूना विद्यालयको रुपमा स्थापित गर्न आफूले हरसम्भव सहयोग गर्ने प्रतिबद्धता समेत जनाए ।
वडा अध्यक्ष बलराम यादवको अध्यक्षतामा आयोजित अभिभावक भेलामा प्रधानाध्यापक अशोक कुमार यादव, शिक्षक महिनारायण यादव, पूर्वप्रअ रामनारायण यादव, विद्यालय ब्यवस्थापक समितिका पूर्वअध्यक्ष ओमप्रकाश यादव, अभिभावक विष्णुकान्त यादवलगायतले शिक्षा सम्बन्धमा विचार व्यक्त गरेका थिए ।
