राजविराज । सप्तरीको कंचनरूप नगरपालिकामा नगर अस्पतालकाे उद्घाटन भएकाे छ ।
आइतबार एक कार्यक्रमकाबीच नगर अस्पतालको उद्घाटन गरिएको छ । नगर प्रमुख ललन प्रसाद गुप्ताले नगर अस्पतालको उद्घाटन गरे ।
प्राथमिक स्वास्थ्य केन्द्र कंचनपुरको प्राङ्गणमा स्थापना भएको अस्पताल २५ बेडबाट संचालन भएको छ ।
मंसिर १६ गते स्थापना गर्ने निर्णय भएपछि कार्यविधि बनाएर अस्पताल संचालन गरिएको छ ।
अस्पतालमा १ एमडी, २ एमबिबिएस चिकित्सकसहित ३० जना स्वास्थ्यकर्मीकाे टाेली खटिनेछन ।
अस्पतालमा आकस्मिक, ओपिडी, सर्पदन्स, दाँत, आँखा र कानकाे उपचार, आकस्मिक प्रसुतीसहितका सेवा संचालन हुने स्वास्थ्य शाखा सह-संयाेजक डम्बर गुप्ताले जानकारी दिए । उनका अनुसार पोषण पुनःस्थापना गृह, रक्तसञ्चार केन्द्र पनि संचालन हुनेछ ।
त्यस्तै, भिडियो एक्सरे, बिशिस्टकृत ल्याब सेवा पनि संचालन गरिनेछ ।
अहिले प्राथमिक स्वास्थ्य केन्द्रमै सेवा प्रवाह गरिने र आफ्नो भवन बनेपछि त्यहाँबाट सेवा दिइने उनले बताए ।
अस्पतालकाे उद्घाटन गर्दै नगर प्रमुख गुप्ताले तत्काल २५ बेड्बाट अस्पताल शुरु हुने भएपनि चाँडै ५० बेडकाे बनाउन पहल गरिने बताए ।
उनले नगरपालिकालाई घरमा शून्य प्रसुती, क्षयरोगमुक्त, कुपोषणमुक्त नगरपालिका घोषणा गर्नका निम्ति काम शुरु गरिसकिएको बताए ।
कार्यक्रममा प्रमुख प्रशासकीय अधिकृत रेणुका साह, वडा नम्बर ८ का अध्यक्ष कृष्णा साह, कार्यपालिका सदस्य शिबमाया निरौला, नेपाल पत्रकार महासंघ, सप्तरीका अध्यक्ष श्रवणकुमार देव, नेकपा एमालेका नगर अध्यक्ष बच्चुलाल चौधरी, जनमत पार्टीका नेता एवं मेयरका प्रत्यासी इन्द्रदेव कगोडिया यादव, इलाका प्रहरी कार्यालय कंचनपुरका प्रहरी निरीक्षक रमेश तिमिल्सिना, नगरपालिकाको स्वास्थ्य शाखा संयाेजक रामसेवक यादव, डा. आकाश रौनियारसहितकाले मन्तव्य व्यक्त गरेका थिए ।
कविता गुप्ताले स्वागत मन्तव्य व्यक्त गरेको अस्पताल उद्घाटन कार्यक्रमको सन्चालन नगरपालिकाका स्वास्थ्य शाखा सह-संयाेजक डम्बर गुप्ताले गरेका थिए ।
अस्पतालका प्रमुख डा. सन्जय कुमार गुप्ताको अध्यक्षतामा उद्घाटन कार्यक्रमको आयोजना गरिएको थियो ।
