राजविराज । राजविराज नगरपालिकाका जनप्रतिनिधी नगर क्षेत्रको अतिक्रमण हटाउन निरन्तर सकृय देखिएका छन् ।
पछिल्लो पटक कंचनपुर रोडको अतिक्रमण हटाउन सूचना जारी गरिएको छ । कंचनपुर रोड अन्तर्गत राजविराज नगरपालिका वडा नम्बर ८ हनुमानन मन्दिरदेखि वडा नम्बर १ पम्प नहरसम्मको अतिक्रमित जग्गा खाली गर्न ७ दिनको सूचना जारी गरिएको छ ।
वडा नम्बर ८ का अध्यक्ष जयनारायण मण्डल र वडा नम्बर १ का अध्यक्ष चन्द्रशेखर चौधरीले शुक्रबार छुट्टाछुट्टै सूचना जारी गर्दै अतिक्रमित जग्गा खाली गर्न भनेका छन् ।
वडा नम्बर ८ का अध्यक्ष मण्डलले जारी गरेको सूचनामा हनुमाननगर मन्दिरदेखि पम्प नहरसम्म उत्तरतर्फ वडा नम्बर ८ मा पर्ने हुलाकी राजमार्गको १५ मिटर चौडाई सडक क्ष्ँेत्रभित्र अतिक्रमण गरी बनाइएको घर, टहरा लगायत अन्य कुनै किसिमले ओगटेको क्षेत्र यो सूचना प्रकाशित भएको ७ दिनभित्र खाली गरी सहयोग गरिदिन अनुरोध गरिएको छ ।
यस्तै, वडा नम्बर १ का अध्यक्ष चौधरीले जारी गरेको सूचनामा हमनुमान मन्दिरदेखि पम्प नहरसम्म उत्तर र दक्षिणतर्फ वडा न्म्बर १ मा पर्ने राजमार्गको १५ मिटर चौडाई सडक क्षेत्रभित्र अतिक्रमण गरी बनाइएको घर, टहरा लगायत अन्य कुनै किसिमले ओगटेको क्षेत्र यो सूचना प्रकाशित भएको ७ दिनभित्र खाली गरी सहयोग गरिदिन सबैमा अनुरोध गरिएको छ ।
